Home Minister Pu R. Lalzirliana chuan vawiina Durtlang MC Hall Auditorium-a Mizoram Upa Pawl: Durtlang Unit Annual Meeting neih chu khuallian niin a hmanpui.

Minister Pu R. Lalzirliana chuan ram leh hnam tana kum upa zawk leh tawnhriat nghah zawkte an hlut thu sawiin, kan hnamah pawh thangtharten upate hlut leh duat nachang kan hre chho telh telh hi a lawmawm hle a ni, a ti a. Tunlaiah ruihhlo leh nun uluk loh avangin kum tamlo te te nunna chan ta mai an tam in, nawmsak leh hausak thlakhleh avanga thil diklo leh kuttlinglo a sum lakluh hrehlo pawh an awm ta zel a, a lungngaihthlak in insiamthatna tur tam tak kan nei a ni, kuallian chuan a ti a. MUP chu Mizorama tlawmngai pawl lian leh pawimawh ber zinga tel annih angin hemi kawngah hian hmalak puiah a sawm a, thangtharte tan engnge an hnutchhiah dawn tih ngaihtuah tur leh zirtir an ngaihna laiah zirtira, kaihhruai turin a duh thu a sawi a. Khawtlang leh ram rorelnaah pawh upa zawkte tello chuan kawng diklo dai palh a hlauhawm theih thu sawi telin, khawtlang leh ram thil tihah te upate chu inkiltawih lovin an tawnhriat te hmanga naupang zawkte finchhuah zel turin a sawm a ni.

Vawiina MUP Durtlang Unit Annual Meeting hi an President Pu Thanchunga'n kaihhruaiin, kum 2017 Annual Meeting neih zawh atanga vawiin thlenga an member boral ta mi 12 sunna an hmang bawk. MUP Durtlang Unit-ah hian tun dinhmunah member 331 (Mipa 138 leh Hmeichhia 193) an awm a ni.