Vawiin chawhma khan Aizawl DC Dr A.Mathumma office chamber-ah Aizawl District Road Safety committee chuan meeting an nei a, member ten an hmalak dan hrang hrang sawi hovin lirthei khaihhnawih chetsualna tih tlem leh pumpelh kawnga an hmachhawpte sawi hona hun an hmang bawk.  

Aizawl DC Dr A.Mathumma chuan Aizawl khawpui chu lirthei khalh tuten awmze nei lova horn hmet ri a bengchheng siam hriattur a tlem avangin khawpui chen nuam tak a ni, a ti a, Aizawl district road safety committee ten hma an lakna zarah lirthei vanga chetsualna a tlem phah ni a lang chu lawmawm a tih thu a sawi a. Aizawl DC chuan memberte chu District Road Safety Action Plan buatsaih mek chu Aizawl-a kan hman thuai theih nan peihfel vat turin a chah bawk.

Aizawl traffic S.P Pu C.Lalthanmawia chuan 2017-18 District Road Safety Commitee thurel bawhzui naa an hmalakna te tarchhuakin, 2017 Christmas vuakvet khan Aizawl khawpui chhungah lirthei chesual report a awmloh thu a sawi a, 2017 chhung hian lirthei chetsual avanga thi hi mi 26 niin kum dang nena khaikhin chuan a hniam tawh hle, a ti bawk. Aizawl khawpui chhungah Zebra crossing 8 awm in over bridge 4 a awm a, zebra crossing hi 4 dang siam belh turin ruahmanna siam a ni a. Aizawl khawpui chhung pawimawh zual tuam turin CCTV 7 dah belh nise tih leh Lirthei chetsual tamna hmun, Accident Prone Areas ah Rangvamual kawng dung, Tuirial dumping ground chhehvel kawng leh World Bank kawng thenkhat te chu puan a, lirthei chesual ven nan a tul anga hmalak nise tih a rel bawk.