New Secretariat Complex hmuna Youth Recreational Centre-cum-Amalgamated Office Complex for Sports & Youth Services Department Office Building sak mek chu vawiin khan Sports Minister Zodintluanga’n a hmunah  tlawhin hnathawh dan a enfiah a ni.

Sports Minister hi Director, Sports & Youth Services Pu Zothanmawia leh MSSC Secretary Pu C.Laltlanthanga bakah Sports Department-a officer leh staff ten an tawiawm a. Pu Zodintluanga chuan hun rei tak atanga an lo nghahhlel em em Sports Department Office changtlung tak an nei tur chu a lawmpui hle thu a sawi a. Mizoram State Sports Council chu kum 42 lai ding tawh leh Sports Directorate pawh kum 32 lai ding tawh chung pawhin mahni office building nei lovin an awm reng a; tuna building sak mekah hian Directorate leh Sports Council an thu leng vek dawn a, hei hi anmahni dawr pawh a tiawlsam sawt dawn a ni, a ti. Sports Department Office Building satu Lushai Engineers te hnenah tha taka hna thawk zel tur leh a hun taka hawn a nih theih nan tan la zel turin a chah bawk.

Youth Recreational Centre-cum-Amalgamated Office Complex for Sports & Youth Services Department Office Building sak mek hi NEC atanga sum hmuh hmanga sak niin 1st installment-ah cheng nuai 416 hmuh tawh a ni a. He building hi chhawng 8 a ni dawn a, chhawng 2 (ground floor & first floor) chu motor parking atan hman a ni ang a; a chung chhawng 3 chu office room hrang hrang tan hman a ni ang. Kawngpui hnuai lamah Basement 4 lai a awm dawn a, chungah chuan Chowkidar awmna tur te, Gym, Museum, Storeroom, Recreational Hall, Scouts & Guides Wing, Adventure Wing, NCC leh NSS Wing te dah a ni ang a; building chung ber (rooftop) ah mi 150 lenna Conference Hall a awm bawk dawn a ni. He building sak hna hi ni 1.5.2017 khan tan niin nakkumah ni 1.5.2019-ah zawhfel theih beisei a ni.

Attachment

• Loading attachment...