Border Area Development Project leh Social Education kaltlanga Cheng nuaih 61 senga sak East Lungdar Community Hall chu Home Minister, Rural Development Minister ni bawk Pu R.Lalzirliana chuan vawiin chawhnu dar 1:30 khan East Lungdar-ah a hawng.

Vawiina Community Hall thar hawnna inkhawmah hian khuallian Pu R.Lalzirliana chuan hruaitu hmasa te leh sawrkar hnathawkte thahnemngaihna leh hmalakna rah seng theih a a awm ta chu lawmawm a tih thu a sawi a, sum hi awm teuh mahse a hmangtuten an zir miau si loh chuan awmzia a nei lova, hna tangkai leh chhenfakawm a thawk thei chuang lo a ni tih sawiin khawtlang mipuiten sawrkar hnathawkte an tawiawm thatna avanga lawmawm a tih thu a sawi bawk.

Home Minister chuan Hall sak thar chu fakin a finishing tha a tih thu leh sawiselna tur awm lova an sa zo chu fakin dik taka sum hman anih chuan hautak lo takin thil tha tak tak a neih thei a ni a ti a, thangthar lo la awm zel tur tana chhenfakawm, Aizawl ah pawh awm se hall chhuanawm ber pawl ni pha tur an nei chu dimdawi tur leh uluk taka enkawl turin a chah nghal bawk a, East Lungdar khawchhung luhna kawng kilometre 2 vel black top loh leh Community Hall thar panna kawng te chu black top thuai anih tur thu a sawi nghal bawk.

Khualzahawm Pu Lalrinmawia Ralte, Parliamentary Secretary pawhin thu sawiin "Change" hi sawrkarin a duh duhin a tihlawhtling ngawt thei lova, mipui rilru a inthlakthleng ve a ngai a, sawrkar leh mipuite an tanrual loh chuan hmasawnna tluantling a thleng thei tak tak lo tih sawiin, East Lungdar khaw mipuite chu Hall tha an neih ang bawk a thil tha dang an neih zel theihna turin rilru zau tak pu a in hawng turin a sawm a, Mizoram khaw tam taka hmasawnna hna duh anga thawh a harsat chhan chu khaw mipuite rilru a in hawn tawk loh thin vang anih thu a sawi bawk.

District Bawrhsap Pu H.Darzika pawhin thusawiin Rural Development Department sawrkar laipuiin a din chhan chu thingtlangah hmasawnna awm se a tih vang a ni a, chu duhthusam tihlawhtling tu khua chu East Lungdar hi ni a a hriat thu sawiin khaw dangte entawn tlak ni zel tura tan la reng turin khaw mipuite a chah bawk a ni.

East Lungdar Community Hall BADP sum hmangin hi June ni 28, 2005 atanga sak tan niin kum 2005-2006 chhung khan Rs. 20 lakhs hman a ni a, engemaw chen sak chhunzawm loh anih hnuin May ni 24, 2010 khan BADP leh Social Education kaltlangin sak chhunzawm leh a ni a, kum 2010-2011 chhungin Rs. Nuaih 41 sen a ni a, avaiin Hall sak zawh nan hian Rs. Nuaih 61 sen ral a ni.

Hall chhung len zawng hi a dung 88 ft. A vang 56 ft. A ni a, Verandah 28x20 ft. A zau a awm a, Operator room pahnih 14x14 ft a zau v eve awmin, Green Room 22x16 ft a zau a awm a, Clycorama 4.9 ft awmin Hall pumpui zau zawng hi 7680 sq.ft a ni a, Hall sak nan hian Brick 22850, Balu (tin) 9662, Cement bag 1480 leh a chung khun nan rangva bundle 39 hman a ni a, hall chhungah hian fixed chair 464 awmin hei hi dah belh a mi 550 vel leng thei tura ruahman mek a ni a, sound system changtlung tak a awm bakah inthiarna hmun changtlung tak a awm bawk a ni.

Vawiin Hall hawnna inkhawm hi Pu K.Laltlawmlova BDO East Lungdar-in a kaihruai a, hall leng lovin khaw mipuite an kalkhawm a ni.