Vawiin chawhma dar 10:30 khan DCs Conference Hall, Saiha ah Pu C.L. Ruala, MP (LS) kaihhruaina hnuaiah Saiha District Vigilance and Monitoring Committee Member ten meeting an nei.

He meeting-ah hian thu sawiin Pu C.L. Ruala chuan kan hnathawh leh hmalakna reng reng hi mipui za-a sawmnga pakhat talin tha an ti tur a ni. Job Card hi mipuite min ti thatchhetu nilovin khawtlang tana thil tangkai leh chhawrnahawm siam nan hmang ila, kan tu leh fate tan thil chhenfakawm kan hnutchhiah thei dawn a ni, a ti. Kan Job Card Holder leh National Census a kan population a in mil em tih te pawh kan enfiah ngun a ngai a ni, a ti bawk. He meeting ah hian Centrally Sponsored Scheme (CSS) khawih department hrang hrangte chuan an hmalak tawhte leh harsatna an neih hrang hrangte report an pek bakah sawiho nghal a ni. Dr. Hniechho, Medical Officer chuan NRHM hnuaia an hmalakna hrang hrangte tarlangin kum 2010 - 2011 chhungin Malaria hrik pai leh pai lo mi 24111 thisen an test atangin mi 804 ten Malaria hrik an pai ngei thu te, HIV/AIDS hrik pai leh pailo mi 1189 thisen an test atangin HIV/AIDS hrik pai mi 7 an hmuhchhuah thu te, raicheha thi mi 3 leh nausen thi 105 an awm thu te leh mi 65 Mit an zai sak thu report a pekna ah chuan a sawilang a ni. Executive Engineer, P & E chuan report pe in Saiha District chhunga thingtlang khua electric eng pek na tur Scheme (RGGVY) a thawktu T & T Projects Ltd. hian an hna hi March 2011 hmaa zo vek tur an nih laiin tun dinhmuna an hnathawh dan en hian an thawk chak lo hle a ni tiin thingtlang khua 15 eng pek turah khaw pahnih chauh an la pe thei a, heng eng an pek khuate pawh hi an hnathawh a that loh thu a tarlang bawk.

He meeting-ah hian Saiha District Vigilance and Monitoring Committee for Rural Development Programme Member te an kal tha hle a, District hmasawnna tura hnathawh tawh leh thawh zel dan tur hrang hrangte pawh huam zau takin an sawiho nghal bawk a ni.