Vawiin chawhma khan Home Minister Pu Lalchamliana chuan ITI Vengah Fire Station Building a hawng. Home Minister hi Serlui Bialtu MLA, Pu Lalrinsanga Ralte leh AMC Counsillor Pu Lalthansanga te'n an tawiawm a. Director, Fire & Emergency Services Pu. L.R. Dingliana Sailo chuan kaihhruaina hun a hmang a ni.

Home Minister Pu Lalchamliana chuan Police leh Fire & Emergency Services  te tan Ni chhinchhiah tlak a ni, a ti a. Fire Station hi Mizoram-ah a indawta siam niin, Fire Station 12 a awm tawh a; Aizawl hi khawpui thang chak tak leh traffic pawh lun em em a nih vangin, kang mei a lo chhuah palha, a rang thei ang bera a hmun tlen a nih theih nan Fire Station 4 siam a ni a, ITI venga Fire Station hi Mizorama Station 12 na a ni, a ti a. Khawpui thang zelah, kangmei chhuahna hmuna a rangthei ang bera thlen theih hi Fire & Emergency Services tum ber ni mah se, kangmei chhuaklo tura tan lak leh fimkhur hi mimal tinte mawhphurhna a ni, tiin a sawi a. Minister chuan Fire Prevention Week hman mek-ah hian in leh ram a kan loh nana meizial bung rama paih loh te, mawmbati chhit tih hlum that te a pawimawh a, meikang chungchangah a thelhna aia kang lo tura hmalak chu a pawimawh hmasa zawk a ni, a ti bawk a ni. Fire motor leh hmanraw chi hrang hrangte chu hman ngailo se tih chu a duhthusam a ni, tiin a sawi a. Fire Station, ITI venga hawn a nih theihnana hmalatu sawrkar hmasa hnenah lawmthu a sawi a, thawktu thahnemngai leh hawnna buatsaihtu Fire & Emergency Services chungah lawmthu a sawi bawk a ni.

Pu Hrangthanga Zote, E.E, PWD chuan technical report a pe a, building sak nan hian 13th Finance Commission atangin sum Cheng Nuai Rs. 267.52 hmuh a ni a. Kum 2012, November thla atanga sak tan a ni a, ITI Fire Station hi chhawng li a sak a ni. Pu Saidingliana SP, Fire &  and Emergency Services chuan lokal te hnenah lawmthu sawiin, he hun hi a khar a ni.

He hunah hian DGP Balaji Srivastava, State Information Commissioner Pu Zorammawia leh midangte an tel a ni.

Report in a tarlan danin January-ah in kang 5, ram kang 9 leh thildang kang 6 a awm a. Kang in a tihchhiat zawng zawng hi Rs 2695000 hu a chhut a ni.