Vawiin khan Champhai Kahrawt YMA Hall-ah Valentine’s Day pualin thisen pek runpui Association for Voluntary Blood Donation (AVBD), MSACS leh Blood Bank, Civil Hospital Champhaite tangkawp  bultumin neih a ni a. He hun 'Show Love, Give Blood' tih thupui hmanga thisen pek runpui neih hi  Pu TJ Lalnuntluanga, Law and Judicial Transport leh Forest Department changtu Minister chuan khuallian niin a hmanpui a ni.

Thusawiin Minister chuan Valentine's Day chu hmangaihna midangte tana inpekna ni anih anga mamawhtu apiangte hman theih tura thisen pek runpui neih a ni chu inhmeh a tih thu sawiin,  bul lo tantute ruahmanna chu finthlak a tih thu a sawi a.  Khuallian chuan Champhai District Hospital-ah Blood Bank tha leh changtlung thawktu indaih zawk a awm theihna tur leh Blood Donation Van neih theihna tura Department kaihhnawih nena thawkhoa hmalak a tum thu a sawi  a. Thisen pek runpui neih tur chu tangkai tak leh mipui tena inzirtirna huna an hman ngei theihna tur atan a hawng a ni.

Thusawitu dang Dr J.Lalramchhuanga, Sr.Specialist, District Hospital Champhai   chuan  India ram pumah kum khatah thisen unit vaibelchhe 5 mamawh a nih thu leh heng zing a zatve vel chauh hmuh anih thu a sawi a. Thisen pekte chu uluk taka sawngbawl anih hnuah chauh pek chhawn thin ani, a ti a. Thisen mamawh tam ber chu ‘O’ positive ani tiin, natna hrang hrang vangin thisen mamawhna a sang zel a ni, a ti a. Thisen  thlak thei a awm lo a, siam chawp theih anih loh avangin thisen mamawh chu thisen pek angai a, chumi tur chuan mi inphalte an pawimawh thu a sawi a. Dr J.Lalramchhuanga chuan Mi hrisel pangaite tan thisen pek a hlauhawm loh a, thla thum danah pek theih a, dam lo tana dam theihna tura tih theih ropui ber chu thisen pek hi a ni, a ti a. Nikum chhungin District Hospital-ah thisen thla tinin Unit 94.16 ang zel mamawhte pek ziah  a nih thu a sawi a. Nikum  chhungin Blood Bank District Hospital chuan mitlawmngaite atangin thisen Unit 1262 dawngin heng zinga Unit 1130 hman ral anih thu leh thla tina mamawh zat chu Unit  80-120 vel anih thu a tarlang bawk. 

Vawiin hun hi Dr Zatluanga Medical Superitendent & President, AVBD Champhai District chuan a kaihruai a. Pu C.Zaihmingtthanga, Secretary, AVBD in pawl hmalakna report a pe a. Pu PC.Lalchuangkima, Asst Secretary, AVBD, Champhai District-a thisen pe tam ber vawi 63 pe tawhtuin  lawmthu sawina neiin hun a khar a ni.

Programme neih lai leh zawh hnu hian a duh apingte tan thisen pek runpui neih a ni.