Vawiinah khan MGNREGS hnuaia State Employment Guarantee Council chu an Chairman Pu Lalruatkima, Rural Development Minister hovin Secretariat Conference Hall ah an thukhawm.

Sawrkar inthlak hnu a State Employment Guarantee Council thutkhawm hmasa berah hian MGNREGA Mizorama kalpui anih dan te, harsatna leh hmachhawp bakah hmasawn dan te thlirho a ni a, MGNREGA kalpui na turin kum 2018-2019 chhung atan Rs. 36,779 lakhs sawrkar Laipui atang hmuh anih tawh thu te, tun thlengin ni 75 inhlawh tawh a ni a, Sawrkar Laipuiin ni 76 thawhna tur sum a rawn pek ah ni 1 chiah thawh hmabak anih tawh thu report ngaihthlak a ni.

Vawiin thutkhawmah hian vantlang/khawtlangin an chhawr tangkai tur community assets siam tam a tul zia sawi niin Wage:Material ratio pawh tuna 90:10 hi 60:40 a thlak tura hmalak dan ngaihtuah tum a ni a, Department hrang hrang hnuaia thingtlang hmasawnna tur Central project hrang hrang te leh MGNREGA inthlunzawm tir a Central sum tam zawk haichhuah dan tur te sawiho a ni bawk.

Heng bakah hian MGNREGA hnuaia thawkte hlawh pawh Sawrkar in minimum wages a bithliah thar nen enmil a a tul anga ruahmanna siam tha tih a ni a, MGNREGA hnuaia thawk te tan Mizoram State Health Care Scheme hnuaia inziahluh a that thu sawi a ni bawk. Hei bakah hian MGNREGA hnuaia thawkte tana Employee’s Provident Fund  ruahman chungchang te, Mizorama MGNREGA kalpui anih dan zir chiang tur mithiam rawih chungchangte ngaihtuah a ni bawk.