Vawiin chawhma khan Transport Minister Pu TJ Lalnuntluanga chuan Champhai District Transport Office, Kahrawt Venga mi chu tlawhin thawktute nen an inkawm. Transport Minister hi District Transport Officer (DTO) Pu Abraham Beirazi Khithie, MCS leh a Staff-ten lo dawngsawngin DTO Pisa-ah inkawmhona leh thingpui inhona an nei a ni.

He hunah hian Transport Minister chuan thusawiin, Transport Department chu sawrkar ba bu ni lovin Sawrkara chhiah chhung lut tha ber pawl department a nih thu leh nikum chhunga sawrkara chhiah chhun luh zawng zawng chu cheng nuai 3621.59 anih thu a tarlang a. Transport department hmalakna tur hrang hrangte leh  chhiah lak luh dante a tarlang a, Department chhunga thawktu indaihlohna leh hmasawnna ruhrel mamawh angte chu sawrkarin a hria a,  a theih ang zela enzui anih tur thu a sawi a. Minister chuan Transport Department chu department pawimah tak anih angin tih len zel tum a ni tiin, Champhai atanga Tahan thlenga Bus Service tuma hmalakna pawh rah duhawm tak hmuh anih ngei a beisei thu a sawi a.

Pu TJ Lalnuntlunga chuan State Transport Authority (STA) dan hmanlaite ennawna thuam chak a nih tur thu pawh sawiin, Lirthei permit pek chungchangah uluk taka kalpui anih dawn thute, mamawh tak tak leh khawpuiin  a dawl zawh dan leh mamawh angte thlir chunga pek a nih tur thu a sawi a, Mizoram puma Lirthei tlanna route te zirchianga chumi ang zulzuia permit pek  tura ruahman anih thu a sawi a. Transport Department a thawktute chu dikna leh rinawmna vawng chunga hnathawk tur leh hminghliau theihnate pumpelh hram hram tum tura fuihin, department hmasawn zelna tura thawhpuiah a sawm nghal a ni.

Pu Abraham Beirazi Khithie, DTO Champhai chuan he hun hi kaihruaiin District chhunga Department hmalakna tlangpui a sawi a. Transport Department hmalaknain nikum July 2018 atanga parking fee khawn hnuah January 2019 thlengin sawrkarah chhiah cheng nuai 2.36 chhung a ni, a ti a.  January 2018 atanga January 2019 thlenga sawrkara chhiah chhun zat zawng zawng chu cheng nuai 226.61 a ni, a ti a. DTO Champhai hnuaiah kum 2018 January atanga January 2019 inkarah  Lirthei inziaklut   1154 a awm thu leh chungte chu Two Wheelers-539, Auto Rickshaw (Passenger)-22, Bus-3, Maxi Cab-35, Motor Cars-220, Jeep, Bolero & Gypsy-43, Taxi-37,  Truck & Lorries- 240, Tractor-1 leh Excavator-14 an nih thu a sawi lang bawk.

Transport Minister hian TransportDepartment Building leh hmunhmate   fangin a enfiah nghal a ni. Minister hi Pu C.Lalbiaka, DFO Champhai, Dr Lallawmkima DIPRO Champhai leh khawtlang hruaituten an tawiawm a ni.