Vawiin khan Urban Development and Poverty Alleviation (UD&PA) Department buatsaihin khawpui hmasawn zelna tur kutpui Deendayal Antyodaya Yojana - National Urban Livelihoods Mission (DAY-NULM) Pakhwada “Shehri Samridhi Utsav” hawnna hun chu  City Park, Aizawlah neih a ni a. Labour, Employment, Skill Development and Entrepreneurship Minister Pu Lalchhandama Ralte chu khuallian a ni.

Pu Lalchhandama Ralte chuan kawngpui tha, building tha leh inbiakpawhna tha neih te hi hmasawnna ni mahsela, rethei leh hausa inkar a hlat a, mipui hmasawnna a inkhairual si loh chuan hmasawnna tluantling a ni thei lo, a ti a.  Khawpui chhunga cheng, mi rethei zawkte, pianphunga rualbanlote leh hmeichhiaten kawng tinrenga hma an sawn theihna tur DAY-NULM hnuaia hmalakna hrang hrang - Self Help Group (SHG) hnena tanpuina an pek theih te, loan an pek theih dan te, pianphunga rualbanlo leh hmeichhiate hamthatna a ken telte hian khawpui hmasawnna tluantling kan neih theih nan kawngro a su hle dawn nia a hriat thu a sawi. Minister chuan he hmalakna hnuaiah thalaiten hna an neih theihna tur job fair te buatsaihin, skill training te kalpui a ni a, chumi zarah mi tam takin eizawnna ngelnghet an lo neih tawhna te, kawng a lo kawhhmuhna te a lawmawm a tih thu a sawi a. Mizo thalaite State chhung leh pawn, ram dang thlenga hna thawk tura kalten Mizo nun ze mawi chhawm nung zel tura fuihin mahni hnam leh culture phatsan lova, ram leh hnam hre reng chunga rinawm leh taima taka eibar an zawn chuan Mizo hnam an chawimawi ang a, Kristianna meichher an chhi nung reng ang, a ti. 

Shehri Samridhi Utsav hi India ram pumah February ni 1 atanga February ni 15 inkar hian hman mek a ni a, Mizoramah pawh District tinah hman a ni. He kutpuiin a tum chu DAY-NULM hnuaia hamthatna awmte pholan a, khawpuia cheng mi retheite tan sum lakluhna kawng mumal tak a awm tih hriattir a ni. Khawpui hmasawnna tura mission hrang hrang Swachh Bharat Mission, Pradhan Mantri Awas Yojana, Jan Dhan Yojana, Pradhan Mantri Jeevan Jyoti Yojana, Pradhan Mantri Surakhsa Bima Yojana, Pradhan Mantri Ujjwala Yojana, Atal Pension Yojana, National Nutrition Mission-ah te DAY-NULM hnuaiah SHG member ten hamthatna an dawng ngei tih he kutpuiah hian enfiah a ni a. College zirlai mi 79 thlanchhuah ten DAY-NULM hnuaia hamthatna dawngtu De-addiciton home Aizawl, Champhai, Kolasib, Serchhip leh Lunglei a awmte tlawhin an mamawh te an zirchiang a. Loan camp te buatsaihin loan sanction letter te pekchhuah a ni a. SHG te leh Street Food Vendors-te tan an kutchhuakte phochhuah leh zawrhchhuahna hmun remchang siam sak an ni a. Thalai hna zawng mekte tan Lungleiah leh Aizawlah hnalak runpui ‘Job Fair’ buatsaih a ni. Aizawla a lawmna pui berah SHG Expo, Street Food Festival leh Job Fair chu ni 14 atanga ni 15 chhung hian buatsaih a ni a, zan dar 9 thleng a duh apiang tan chhim theih a ni. 

Hawnna inkhawm UD&PA Secretary Dr.C.Vanlalramsanga kaihhruaiah hian Minister Pu Lalchhandama Ralte chuan loan sanction letter a semchhuak a, UD&PA Director Pu Joseph H.Lalramsanga’n DAY-NULM-a Mizoramin hlawhtlinna hrang hrang a neih tawh te a sawi a,  UD&PA Deputy Director Pu RL Zidinga’n lawmthu sawiin hun hnung a khar a ni.