507/2023-2024

Aizawl, 19^th May 2023: Vawiin khan Mizo High School tualzawlah ‘Day of Govemiknights 2023’ chu neih a ni a. Home Minister Pu Lalchamliana chu khuallian niin, Govt. Mizo High School atanga HSLC pass chhuak zirlai titha te hnenah chawimawina a hlan nghal a ni.

He hunah hian Home Minister chuan a zirchhuahna school-ah ngei hun a hmang thei chu lawmawm a tih thu a sawi a. Mizo High School chuan mi hlawhtling leh chhuanawm tam tak a lo chherchhuak tawh a ni, a ti a. Hlawhtlinna an chan theih nan zirlai kalkhawmte chu taimakna nun nei tur leh ruihtheihthil laka inthiarfihlim turin a fuih a. Ram hmasawnna bulthut chu chhungkua a ni tiin zirlaite chu chhungkaw chawm thei tura intodelh tur leh khawtlang leh kohhran tana mi puitling ni turin duhsakna a hlan nghal bawk.

Khawvel hmasawnna in a hrinchhuah smartphone leh computer te chu nun tihmasawntu leh tiawlsamtu an nih rualin hman dan thiam a ngaih thu Home Minister chuan a sawi a. Social media-a thudik tawk lo thehdarh awm thin chuan mimal leh hnam inkarah inhmuhthiamlohna a thlen theih avangin fimkhur a ngai a ni, a ti a. Chi leh chi inkara buaina thleng thin chu pawi a tih thu sawiin Pu Lalchamliana chuan hemi kawngah hian thangthar ten rilru puitling an put a tul thu a sawi a. Zirlaite chu hnam ziarang leh sakhaw hrang nei te enhrang lo turin a chah nghal bawk a ni.

He hunah hian Govt. Mizo High School Headmaster Pu Hmingchungnunga, Govt. Mizo HSS Principal Pi C. Lalthangpuii bakah khualzahawm ‘Class of 1973’ leh he hun huaihawttu ‘Class of 1998’ aiawh ten thu an sawi bawk.

Govt. Mizo High School Alumni hi May ni 19, 2017 khan din a ni a. Alumni din champha May ni 19 hi ‘Day of Govemiknights’ ah hman thin niin, Mizo High School zirlai ni mek leh ni tawh phawt chu ‘Govemiknights’ hian a huam vek a ni.