506/2023-2024

Champhai, the 19th May, 2023: Mizoram Board of School Education (MBSE) buatsaih HSLC Exam result chhuaka Mizoram puma palina (4th Rank) dinhmun hauhtu Esther Tingbiakmuani, Bethel Mission School (BMS) Champhai, chawimawina leh Bethel Mission School atanga hlawhtlinna changte lawmpuina hun Bethel Community Hall-a vawiin chawhnu dar 1 a hman chu District Bawrhsap Pu James Lalrinchhana, District Education Committee (DEC) Chairman ni bawk chuan khuallian niin a hmanpui.

Khuallian District Bawrhsap Pu James Lalrinchhana chuan Bethel Mission School-in HSLC result tih chhuah takah Mizorama puma 4-na dinhmun hauhtu leh District pum tihmingthatu Esther Tingbiakmuani leh zirlai tha tak tak a chherchhuak thei chu lawmawm a tih thu sawiin, hei hian kan District atanga rual kan el theih zia leh theihna nasa tak kan neih zia a pholang a ni, a ti a. Zirlai pass zawng zawngte a lawmpui thu sawiin, hetih rual hian hlawhtlinna chang ta lote pawh hnual mai lova theihtawp chhuah chhunzawm zel turin a fuih bawk.

District Education Committee Chairman ni bawk chuan hmasawnna ruhrel dangte hlamchhiah chuang lovin Champhai District-ah Zirna, Hriselna leh Infiamnate ngaihpawimawh zual deuh deuh tum a nih thu a sawi a. Zirna ti hmasawn tur leh result duhawm tak nei turin Zirtirtu, Zirlai leh Nu leh pate tanrual a pawimawh thu leh, inchhung khur atanga intan zirna kawnga rualawhna dik neih a tul thu a sawi a. Bethel Mission School-in Mizoram pawn thlenga inphochhuahna hun leh result duhawm tak an lo hawn thin tawhte chu ropui a tih thu sawiin, hengte hian zirlaite thinlungah inrintawkna leh rualelna tha leh dik a tuh thin a ni, a ti bawk.

Taksa, rilru leh thlarau nun ngaipawimawh chunga zirna kalpui thiamin awmzia thui tak a neih thu leh rah tha a chhuah thin thu sawiin, zirlaite chu taksa leh rilru hriselna ngaipawimawha ruihhlo laka fihlim tum tlat turin a chah a, malsawm tlaka in taimak phawt chuan hlawhtlinnain a umzui dawn che u a ni, a ti a. Huaisenna leh phurna nen anmahnia chakna awmte haichhuak tura theihtawp chhuah turin Zirlai kalkhawmte a fuih a. Bethel Mission School kalzelna turah duhsakna a hlan nghal bawk a ni.

He hunah hian PCI Bethel bialtu Pastor Rev. Dr. Rualthankhuma'n hunserh a hmang a. Principal Pi K.Malsawmdawngi'n report pein inhmelhriattirna hun a hmang a. DIPRO Champhai Dr. Lallawmkima leh Pu ZL Thanga F/o Esther Tingbiakmuani te bakah DEO Office Champhai, MZP Hqrs. Champhai, Bethel Veng VC leh YMA aiawh te'n thu an sawi bawk.

Bethel Mission School-ah hian Nursery atanga Class X thleng zirna a awm a. Kumin HSLC result tihchhuahah khan pass percentage 93.5% (Candidate 46, Pass 43) an nei a; Distinction-a pass 11 an nei a, subject tina letter mark hmu vek zirlai 7 an awm a. Kumin HSLC result tihchhuah takah khan Mizoram puma 4-na dinhmun hauhtu an nei a, hemi hma hian kum 2019 khan HSLC Exam-a 10-na (10th Rank) dinhmun hauhtu zirlai pahnih an nei a, kum 2020 ah khan Mizoram puma 10-na dinhmun hauhtu zirlai pakhat an lo nei tawh bawk a ni.