Vawiin khan Home Minister Pu R. Lalzirliana chu Mizo Students’ Union (MSU) buatsaih Mizo Zirlai Graduate Toppers te Lawmpuina, Vanapa Hall-ah khuallian niin, lawmpuina hi zirlai 24 hnenah a hlan a; Minister Pi Vanlalawmpuii Chawngthu chu Khualzahawm a ni.

Khuallian Pu R. Lalzirliana chuan Graduate Topper te lawmpuina MSU-in a buatsaih thei chu lawmawm a ti a. Ram leh Pathian tana thawkzel turin leh a neitu tak tak ni tura thiamna sang tak nei chho zel turin leh Central Service hrang hrang exam te pawh pe chho zel turin a fuih a. Minister chuan thawmhnaw fai piah lamah, thiamna hi incheina diktak chu a ni, a ti a. Ram zahawmna leh ropuina hi thiamna-ah a innghat zawk a ni, tiin a sawi a. Zirna piah lamah eizawnna a awm a, lehkhabu piahlamah eizawnna pawh a awm tih hriat tel a tha a ni, a ti bawk a ni. Lehkha thiamna in a ken tel chu Mizo kan nihna kan hlut leh zual hi a ni, a ti a. Ze mawi nei, lehkhathiam ni zel turin leh nu leh pate chhawmdawl kawngah pawh theihtawp chhuah turin duhsakna a hlan a ni.

Khualzahawm Pi Vanlalawmpuii Chawngthu pawhin thusawiin harsatna tam tak hlawhtlinnan kaltlang a ngai a ni, a ti a. Tum sang turin leh mahni sehna mual mualah tan la zel turin a ngen bawk a ni. Zoram dinhmun ngaihtuaha zirmi te’n thahnemngai zir zel turin a fuih a ni. Tun hlawhtlinna hi a bul tanna chauh a ni, tiin a sawi a.

Graduate Toppers 24 zingah hian Hrangbana College atangin zirlai 4, Pachhunga University College atangin zirlai 14, Govt. Zirtiri Residential Science College atangin zirlai 2, Govt. Aizawl College atangin zirlai 1 leh Govt. Mamit College atangin zirlai 1 leh Lunglei Govt. College atangin zirlai 1 an tel a ni.

College hrang hranga Students’ Union a tel titha zualte hnenah Khuallian leh Khualzahawm chuan lawmpuina an hlan bawk a ni.

Hemi hun hi College hrang hranga zirlai thahnem tak leh zirlai nu leh pa tellin, Mizoram Upa Pawl te pawhin an tel pui a ni.