Vawiin khan Govt Champhai College Multipurpose Hall-ah Govt Champhai College-in Freshers’ Social leh Graduation Day an hmang a, Champhai North Bialtu MLA Pu TT Zothansanga chu Khuallian a ni.

Khuallian Pu TT Zothangsanga chuan zirlai naupangte chu college tha tehnaa Mizorama Grade nei sang bera an lut thei chu inchhuanna tham a nih thu a sawi a. Kan dam khawchhuak dawn nge dawn lo tih college kan kal tan atang chiah hian a intan a ni tiin hlawhtlinna kawng peng thuamah kan ding mek a, khawi kawng ber nge kan zawh dawn tih kan thlan thiam a ngai a, kan dam khawchhuahna kawng zawh turin kan ko-ah mawhphurhna a in nghat tan chiah a ni, a ti. Kan nu leh pate'n beiseina sang tak neiin kan chungah rinna an nghah avangin zirna sang zawk kan neih theihna turin sum tam tak leh tha leh zung an seng a, kan nu leh pate'n min rin ngam ang ngei a lehkha kan zir a a ngai a, kan tana an senso zawng zawng hi taimaknaa kan do let ve a ngai a ni, a ti .Lehkha kan zir chhung chuan kan zirlai aia pawimawh dang kan nei tur a ni lo, a ti a. Lehkhathiam tak tak tan hna a van loh thu sawiin mi tam takin tunlaiah sawrkar hna a vang tiin sawi thin mahse, India ramah hian exam pek sen loh khawpa tam hna ruak advertisement hmuh tur a awm reng a, mi thiam tak tak tan thawhsen loh hna a la awm a, hna hmu tur leh chhawr tlak ni tur erawh chuan zirlaia tan lak a ngaih thu a sawi. Social Media-in thalai leh zirlai ho min run mek a, a hman dan chin tawk thiama a tangkai zawnga hman tul thu pawh tarlangin kan zirlaia kan mamawh leh kan hriat duhte internet-ah a awm vek avangin college tha leh tha lo tih hi chhuanlam a tling tawh lo, a ti a. Thiamna lama tan kan lak loh chuan khaw dang leh hnam dangte'n thiamna hmangin min awp bet mek a, hei hi thiamna hmang bawka kan do let loh chuan tlan chhuahna dang kawng dang a awm lo, a ti bawk. Zirlai kalkhawmte chu Champhaiin hmasawnna a neih theihna tura Drafting Committee member zinga tel ve an nih in hre reng tura fuihin an vawiin hun te hmang thaa an tu chhuan lo kal leh zel turte tana kawng sialtu pawimawh tak an ni tih in hrereng turin a chah bawk. 

He hun hi Govt Champhai College Students' Union Vice President Lalhruaitluanga chuan a kaihhruai a, Khualian hian Govt Champhai College Annual Magazine 'Chamdel' a tlangzarh a. Govt Champhai College Principal Associate Prof. Lalchhanhimi Khiangte bakah zirlai lut thar leh zirlai senior-te hnen atangin thusawi ngaihthlak a ni. Chawhnu lamah Graduation day hmangin Award sem nghal a ni a, Lalthazuali d/o Hrangsailova leh Robert Nangkhenthang s/o Victor Luandeihpiang hnenah Prof CJ GFeorge Proficiency Award hlan a ni a,  Zothanpuii d/o T Lalrinsanga hnenah Dr. Helen Hmar Memorial Award hlan a ni a, V Lalruatfela s/o Laltlanthanga hnenah Lalnunmawia Award hlan niin C Lalremruati s/o Hranglianmawia hnenah Ruata & Thankhumi Memorial Award hlan a ni bawk.

MZU in Under Graduate result a tih chhuah takah khan Govt Champhai College atang hian 6th Semester-ah zirlai 115 examiin za zelah 60.87 an pass a, Ist Div-ah 32, 2nd Div-ah  36 pass a, pass mi 2 an awm bawk.  6th Sem B. Sc ah mi 25 exam in 14 an pass a, za zel ah 56 an pass a ni, I Div ah 13 pass in II Div ah 1 a pass bawk. IV Sem BA ah mi 164 exam in 114 an pass a, za zelah 69.51 an pass a, IV Sem B. Sc ah mi 19 examin 12 an pass a, za zelah 63.16 an pass a, II Sem BA ah mi 144 exam in 74 an pass a, za zelah 51.39 an pass a, II Sem B. Sc ah mi 16 exam in 6 an pass a, za zelah 37.5 an pass a, II Sem B. Com ah 8 exam in 4 an pass a, za zelah 50 an pass bawk a ni.

 

Attachment

  • Loading attachment...