Vawiin khan Pu T. Vanlaltlana, Divisional Horticulture Officer, Tuidam kaihhruaina hnuaiah Kawrtethawveng Community Hall-ah Aspirational District hmalakna kalzel bawhzuina atan Krishi Kalyan Abhiyan Scheme hnuaiah thingfanghma chin dan leh a enkawldan inzirtirna neih a ni.

He hunah hian Pu Lalduhzuala Colney, M.Sc (Agri), Horticulture Extension Officer chuan thei ei tamin mihring taksa-a hriselna a thlen theih dan (Nutritional value of Fruits and its Impact on Human Diet) chungchangah zirtirna pein mihringte'n nitin thei 120 g kan mamawh a. Thei awlsam taka ei mai theih chin uar deuh deuh turin a chah. Thingfanghma hian Protein, Vitamin A&B bakah Minerals a pai thu tarlangin  hriselna atana ei thin tur leh phun uar deuh deuh turin kalkhawmte a chah a ni.

Pi F. Lalrinpuii M.Sc (Horti), Horticulture Extension Officer pawhin Thingfanghma hriselna leh thatnate bakah a enkawl chhoh dan (Production Technology of Papaya) chungchangah zirtirna a pe a ni.

Horticulture Extension Officer-te hian Projector hmanga Thingfanghma chin dan inzirtirna neiin sik leh sa chungchang bikah thingfanghma chuan ram lum a ngeih thu leh hei vang hian Tropical Plant tih a nih thu te, Temperature 18-24 degree Celsius inkar a duh a, ram lum leh hnawng ruahtui tlak tamnaah a that duh bik thu tarlan a ni a. Thingfanghma tiak hi phun atanga kum 1 chhungin a rah a, kum 3 atanga kum 5 thleng a rah a seng theih thu tarlan a ni bawk. Hriatfiah loh neite tan zawhna leh chhanna hun hman nghal a ni bawk.

He hunah hian Beneficiary 100 hnenah Thingfanghma tiak tha chi Red Lady 5 zel sem niin khawtlang hruaitute'n an telpui a ni.