Vawiin chawhma khan Archive Hall, Babutlangah Information & Public Relations (I&PR) Department leh Mizoram Art Development Society (MADS) tangkawp buatsaih kum tina hman thin Art Workshop 2018 hawnna hun neih a ni a. I&PR Jt.Director leh Visual Arts State Nodal Officer ni bawk Pi Lallianpuii, MIS chu Khuallian a ni. Workshop hi July Ni 10-13,2018 chhunga neih tur niin mipui tlawh theiha ruahman a ni.

Khuallian Pi Lallianpuii chuan art hi mihring zia, hmun hma zia leh ram zia tarlanna a ni a, lemziak pakhat hian thil tam tak a sawi thei a ni, a ti a. Lemziaktu thiam tak kutchhuak chu a chungnung bikin a chhuanawm a, hetiang hi mitin tih ve theih loh a ni, a ti a. Tuina leh kalna chi khat nei ten workshop an hmang ho tur chu lawmawm a tih thu a sawi a. Vawi tam tak art workshop hi buatsaih a nih tawh thin a, hlawhtlinna tam tak hmuh a nih thin bakah mipuiin an hlut hle a ni, a ti a. I&PR leh MADS hmalaknain ram pawn lama Mizoram House hrang hrang leh Lengpui Airport thlengin MADS member-te lemziak phochhuah a ni tawh a ni, a ti a. Kan talent neihte tipung zel ang u tiin kalkhawmte a fuih a. Lemziak mawi leh hlu tak tak chu mipuiin kan ngai hlu reng a, lemziaktute kan hriat reng phah a, an hming a dai tawh ngai lo a ni, a ti a. I&PR Department chuan MADS tan thahnemngai takin an thawh zek tur thu a sawi a. Workshop chuan rah tha tak a neih ngei a beisei thu a sawi a ni.

Pranab Baruah Award 2017 dawngtu Pu Tlangrokhuma atangin Pranab Award chungchang ngaihthlak a ni a. Pu Tlangrokhuma hi MADS chuan chawimawiin citiation leh pawisa fai an hlan a ni. Pranab Baruah Award hi fine art lama sulsutu Assam mi Pranab Baruah hriatrengna atana buatsaih a ni a, Pu Tlangrokhuma hi he award dawng thei 16-na a ni.

MADS hi July 2012 khan din niin tun dinhmunah member 100 vel an awm a, workshop-ah hian mi 51 an tel thei a ni. Lemker lam mi 4, water color hmanga lemziak tur mi 12 leh canvas lemziak mi 35 an ni dawn a ni.

Art Workshop 2018 hawnna programme hi MADS President Pu H.K.Jerry Ramliana chuan a kaihruai a. MADS Secretary Pu V. Lalzawmkima atangin MADS chungchang report ngaihthlak a ni a. MADS President chuan lawmthu sawina in hun a khar a ni. I&PR hnathawkte leh MADS memberte an tel a ni.