NH-150, Sesawng leh Khawruhlian inkar Tuirini bailey bridge dawh that mek chu zawh a nih hmain vanduaithlak taka February Ni 13, 2018 a chim hnuah, Central Sawrkar ta niin an sum sen tur a ni a, mipui harsatna rang taka phuhruk a nih theih nan State Sawrkar chuan lei dawh that leh nan March Ni 15, 2018 khan Rs.210 lakhs a sanction a, hna pawh tan nghal a ni.
Lei hmasa kha ft 200 a sei niin, tuna dawh thar hi chu ft 160-ah a do na ban (RCC Pier) phunin, a vaia sei zawng chu ft 210 a ni thung ang. A do na ban hi zawh a nih hnuah chauh Sesawng lama dotu (abutment) hi thawh tan theih a nih bakah, RCC Pier hna thawktuin harsatna hrang hrang a tawh avang leh abutment hna thawktuin beisei anga a thawh chak loh avangin July Ni 3, 2018 khan a do na hna hi zawhfel a ni. July Ni 4, 2018 atangin Sesawng lam khawmual laihzawlah lei hmanrua chu ft 100 vel remkhawm hna thawkin, July Ni 7 atangin lui lama nawr tawlh hna tan a ni a. Khawruhlian lam lui kamah thir lei nawr lo hnuk tur khawl dah a ni bawk a. Tum khatah a nih dan tur ang a bang (panel) inthuah (double-double) nawrkai lovin, a mal (single) nawr tawlh hnuah a bang thuah (double-single) in a zui ang a, chumi hnuah a bang (panel) thuah leh chherchhuan (double-double) in a zui ve leh chauh dawn a ni. Tum anga thawh tluan theih a nih chuan, July Ni 21, 2018 ah chuan nawrkai zovin, a chhuat phah leh a sir tawn tawna lawnna (approach road) siam that leh nen July thla tawpah chuan zawh hman hram tumin theih tawp chhuah zel a ni.
Lei dawh chhunga lui kanna tur a helna (diversion road) siam chu, tuilianin Khawruhlian lam khawmual a hawrhchhiatna ah YMA-in thing lei an dawh zawm hmangin motor te chu a kalkai thei reng a, harsatna lian lutuk awm lovin kalkai zel theih a la ni a. He helna(diversion road) tuilianin a chim emaw, a tihchhiat thuta kea kalkai na tur “foot suspension bridge” pawh zawh theiha peih a ni tawh bawk. Tum leh ruahman anga ranga lei dawh zawh mai theih a nih loh avanga mipuiin harsatna an tawk chu PWD chuan pawi an ti hle a. Theihtawp chhuaha kan beihna hi mipuiin min lo ngaichang a, dawhthei taka hriatthiamna nen lo nghak hram hram turin kan ngen a ni.
