Vawiin khan Home Minister Pu Lalchamliana chuan Tanhrilah Central Women's Jail a hawng. He jail hi hmeichhe tan, a bika siam Mizoramin a neih hmasak ber a ni. Home Minister hian Social Welfare Department hmalakna “Pilot intervention for drug treatment services among prison inmates” pawh a hawng nghal bawk a ni.

Home Minister chuan Jail hi inhremna mai ni lovin insiamthatna hmunah i siam ang u tiin kalkhawmte leh thawktute a sawm a. Hmeichhe tan bika siam Jail kan neih theih nana hmalatu sawrkar hmasa chungah lawmthu sawiin “Ka duthusam chu he hmeichhe jail-ah hian tang tur awm miah lo se, tih hi a ni”, Minister chuan a ti. Ram changkangte tih dan angin jail hi mi sualte insiamthatna “rehabilitation” hmuna siam a duh thu leh chumi atan mi thahnemngaite nen hma an lak tan mek thu Pu Lalchamliana chuan a sawi a. Tuten emaw an nun thalo an sim a, jail atanga an chhuah hunah nun thar neia, eizawnna tha an neih theihna tura jail tangte enkawlna hmunah siam a duh thu sawiin Home Minister chuan hetiang lama mi thahnemngaiten a hnenah rawtna an thlen duh a nih chuan a inhawn reng thu a sawi a ni.

Cheng nuai 1306.95 senga sak Central Women's Jail hi kum 2015, November thla atang khan sak tan a ni a, August 2018 khan zawhfel a ni. A sakna sum hi sawrkar laipui Ministry of DoNER hnen atanga hmuh niin a zau zawng (floor area) belhkhawm hi 2611.03 sq.m. a ni. Women's jail sakna hmun hi kawt zawl zau tak a awm theih nan laih zawl belh a ni a. Security atan a hmun pumpui hi banga hung chhuah vek a ni. A chhungah hian Administrative block, Convicted Prisoners te awmna tur building, convict la ni lo thubuai ngaihtuah lai mekte awmna tur building,  medical inspection building, classified prisoners cell block, isolation cell block leh quarters te a awm s. Recreation hall, recreation room, computer room, vocational centre leh quarantine cell te pawh dah tel a ni bawk.

Social Welfare Department hmalaknain “Pilot intervention for drug treatment services among prison inmates” tih hawn tel nghal ni bawkin Mizoram Social Defence & Rehabilitation Board kaltlangin Central Jail-a awm mekte tan ruihhlo laka invenna leh enkawlna turin hmalak tan a ni dawn a. Hemi chungchang sawi zautu Social Welfare Secretary  Pi Zoramthangi Hauhnar chuan he pilot intervention lo pian chhuah dan leh hmalak dan tur tlangpui a sawi. Social Welfare Department-in kum 2017-a zirchianna an neih atanga a lan danin chawhrualin jail tangte kum hi kum 28 a ni a. Zawhna chhangtu mi jail tang 323 zinga 31%-te chu ruihhlo khawih vanga tang,  66% chu jail luh hmaa heroin ngawl vei tawh, 87.9% chu damdawi hmansual theih chi hrang hrang hmanga inchiu tawh, 56.3% chu ruihhlo an khawih avanga harsatna an neih enkawlna dawng tawh te an ni.  Ruihhlo hmansual leh ngawlveinain a ken tel mental illness nei 14% an awm a, 9.3% chuan hepatitis an vei a, 3.4% in thin ro natna, 2.8% in TB an vei tih hriat a ni.

Pilot intervention hi thawh thuma kalpui tum a ni a. A thawhkhatna ah jail-a doctor, nurse leh counsellor te hnenah jail tangte zinga ruihhlo leh a kaihhnawih atanga harsatna awm thei - rilru leh taksa natna chi hrang hrang te zirtir tum an ni a. A thawh hnihnaah ruihhlo hmansual leh tluk lehna (relapse) chungchangah jail tangte counseling mumal tak pek an ni ang. Counsellor te kaltlangin nun inthlakthleng leh relapse laka invenna an neih theih nan mumal leh awmze nei taka ruahhmanna duanpuiin, counseling an neihpui ang a.  A thawhthumnaah jail an chhuahsan hnuah pawh chhut zuina leh enkawl zuina (follow up) neihpui zel tum a ni a, he mi thawk tur hian  outreach worker leh peer educator te an awm dawn a ni.

Vawiin Programme hi Home Secretary Pu Lalbiakzama’n a kaihruai a. Inspector General of Prisons Pi Maria CT Zuali pawhin thu sawiin Home Joint Secretary Pi Ramdinliani’n lawmthu sawiin hun hnung a khar a ni.

Attachment

  • Loading attachment...