Nimin khan Tourism Minister Pu Robert Romawia Royte chuan Shillong-ah Meghalaya Chief Minister Conrad Sangma kawmin DoNER Ministry leh North-East Council-in India hmarchhak state te tana  sanction system an hmanlai chu tihdanglam an duh thu an sawi dun a. Hei bakah hian Meghalaya-ah Mizoten him tak leh hlim taka awm zel an inbeisei thu leh Meghalaya Sorkarin a ngaihsak avangin lawmthu a hrilh a. NEIGRIHMS hospital bula Mizoram sorkarin building sak a tum chungchanga harsatna deuh awm chungchang pawh sawipuiin Meghalaya Chief Minister chuan he harsatna hi sutkiansak a tiam bawk.

Tourism Minister hian Meghalaya Home Minister  Pu James Sangma leh NEC Secretary te pawh a kawm bawk.

Nimin vek khan Tourism Minister chuan Interstate Mizo Students’ Meet, NEHU Campus Shillong-a neih mek chu a hmanpui a, he hunah hian thu sawiin hmun hrang hrang atanga Mizo thalai rual kalkhawmte chu taima taka zirlai zira, hnam dangte lehpel thei tura tan la tura fuihin, hun hmang thiam turin a chah a, Mizoram Sorkarin hmun hrang hranga Mizote inunauna leh inpumkhatna a takin a ngaipawimawh a, hemi kawnga hmalakna atan Mizoram budget-ah cheng nuaih 100  dah anih thu a sawi bawk.

Pu Robert Romawia Royte hian Shillong Group YMA te pawh chawchhun eipuiah sawmin Shillong-a Kut hman dan turte an sawiho bawk a ni.