Fisheries Department huaihawta Champhai Sangha khawitute tana buatsaih ‘Fish Farmers Training’, I&PR Auditorium Champhaia neih chu Fisheries Minister Pu K.Lalrinliana chuan khuallian niin a hmanpui. He hunah hian Pu C.Laldawngliana, Director Fisheries Department chu khualzahawm a ni. 

Khuallian chuan Sangha Dil siam leh tharchhuah kawnga Champhai District hmalakna chu fakawm a tih thu sawiin,  Society hrang hrang ten thothang tha taka Sangha vulh kawnga tan an la chu hmuh nuam tak a ni, a ti a. Kum 40 chuang Fisheries Department in Sangha a khawi hnuah pawh hnianghnar taka kan intodelh lo chu inenletna tham  a ni a,  hemi kawngah hian Sangha khawitute leh Sawrkar department tan ho a ngai takzet a ni, a ti a.  State dang leh ram dang atanga Sangha lo  lut tam tak awm hian Sangha tharchhuah lama kan intodelh rih lohzia  lantirin, Sangha hetiang zat zawrh ani hian Sangha khawi chu eizawnna  tlak anih zia a tihlan thu a sawi a.  Sangha khawitu kalkhawmte chu Sangha khamkhawp tharchuak tura tan la sauh sauh tur leh tualchhung Sangha tui leh hrisel, man man zawkin Bazar a luah hneh  ngei theihna tura tan la turin a chah bawk.

Minister chuan  Champhai District-ah Sangha khawitu tam tak an awm  chu lawmawm a ti a. Tualchhung thar ngei Sangha zuar hmuh tur awm thin chu lawmawm a tih thu sawiin, Sangha  man leh zawrh tur sawngbawl kawngah fimkhur a ngai a, a man leh pack danah felfai leh him tha taka a leitute  hip thei tura buatsaih thin a ngai a ni, a ti a. Ei leh bara kan la intodelh loh thu sawiin, Buhfai State pawn lam atangin thla tin Quintal nuai khat leh sing khat chawluh anih thin thu sawiin, intodelh anih  theih nan sawrkarin tan a lak dawn thu leh kan ram thar Buhte ration a sem thei tura hmalak tum anih thu a sawi a. Pu K.Lalrinliana chuan Sangha chi intodelh thei tura a note tharchhuah lama tanlak  angaih thu leh pawn lam atanga chawlut lo a hatchery tam zawk bun anih theihna tura ngaihtuahna sen angaih thu a sawi a. Kan ram siam ngei Sangha chaw kan hmang thei lo chu pawi a tih thu sawiin, hemi lam hawi a hmalak a tul dawn thu a sawiin, Sangha chaw siamna tura mamawh  tualchhung atanga awm thei ang angte chhawr tangkai anih theih ngat chuan  Sangha chaw tha taka intodelh theih a ni a, Sangha Chaw siamna tura pawlh tur tha hnim, thlai leh thei hrang hrang kan ram a awmte zawnchhuaha hman tangkai theih dan  ngaihtuah a duhawm hle dawn a ni, a ti bawk.

Fisheries Minister chuan Training chhim tura kalkhawm Sangha khawitute chu mithiamte sawi uluk taka ngaihthla a, a taka chhawr tangkai tum theuh turin a fuih a. Champhai District-in  Best Fish Farmer in North East States a nei thei chu ropuiin chhuanawm a tih thu a sawi a.  Hei hian  Champhai District in theihna nasa tak aneih zia a nemnghet a, mitinte  ti ve theitu nih inhria   ti tak taka District dang zawng khuma Sangha thar tam ber nih tum tura tan la zel turin a chah a ni.

Khualzahawm Fisheries Director Pu C.Laldawngliana pawhin thusawiin, Fish Farmer-te tana District level  training neih tur zinga a hmasa ber tur Champhai a neih tan a ni chu lawmawm  a tih thu a sawi a. Sangha khawitu hlawhtling tak he lama tui mi Minister Department-in a nei chu vanneihthlak a tih thu leh a lakah beiseina sang tak neih anih thu a sawi a. Hun reilo chhungin Minister kaihhruaina hnuaiah  hmalakna thar neih anih  tawh thu tarlangin,  Kolasib leh Bilkhawthlir  Vur khawl siam ni tawhin eng tik lai pawha hman theih a nih thu leh Lengpui farm-ah Nghahrah, Lengphar  leh Nghasen-te khawia enchhin mek a ni, a ti a. Sangha chaw man tlawm zawka zawrh anih dawn thu leh Champhai District mamawh Quintal 625 pek tum anih thu  sawiin,  Sangha chi pawh sem mai theih tura peihfel a ni a, Sangha manna tur Len hrang hrangte tun atanga reiloteah a awm dawn thu a sawi  bawk.

Fisheries Director chuan  Fish Farmers Society leh DFDO viak tha takte hmalakna fakin hmachhawpte thlirin phurawm a tih thu a sawi a. Kum 2018-2019 chhungin Mizoramah  Sangha  khawitu mi 16263 an awm thu leh ram Hectare 5477.04 a zau Sangha Dil awmin, Metric Tone 7024.13 tharchhuah anih thu a sawi a. District zingah Kolasib chuan Sangha khawitu ngah berin mi 2980 a nei a, pangana Champhai District-ah  Sangha khawitu mi 1785 an awm thu a tarlang a. Sawrkar hmalakna hmangin Sangha chaw indaihlohna awm lo tura hmalak  niin hmasawn zel tum a ni, a ti bawk. Sangha khawitute chu rilru leh tih takzeta  tanla sauh sauh turin a chah a ni.

Vawiin Fish Farmers’ Training Programme hi Pi Lucy Lalrinpuii, DFDO Champhai chuan a kaihruai a. National Fisheries Development Board (NFDB) buatsaiha North East State atanga Sangha khawitu titha ber lawmman latu Pu F.Lalhmingliana, Champhai Kahrawt hnenah Minister-in chawimawina Certificate leh tangkafai a hlan a. Pu F.Lalhmingliana hian Champhai Tlangsam khaw hnuaia a Sangha  Dil Hectare 0.1 a zau atangin Sangha Metric Tone 2.5 chuang a thar a ni. Training-ah hian Pu Lalmalsawma, Fisheries Demonstrator (FD) hnen atangin Dil enkawl dan ngaihthlak a ni a. Pu K.Lalrinawma, Fisheries Extension Officer (FEO) in Sangha Chaw pek dan zirtirin,  Pu Lalchhuanawma, FD in Common Carp inthlahpuntir dan a zirtir bawk a. Sangha khawituhi mi 100 bawr vel telin an hlawkpui hle a ni.

FCS&CA, LAD leh Fisheries Department changtu Minister hian tukin khan Supply Department ram leh Building  Keifangtlang; LAD Park, DC Road; DLAO Office Kahrawt leh DCSO Office CHANEM Building ami te tlawhin a enfiah a, Chawhnu lamah NFDB buatsaih North East State atanga Sangha khawitu titha ber lawmman latu Pu F.Lalhmingliana, Champhai Kahrawt Sangha Dil, Tlangsam tlawhin hemi hnu hian Fish Farmers’ Society-te ram leh Sangha Dil, Zotlang   leh FCS&CA Godown Champhai Jail Veng a mite a tlawh bawk. Minister hian naktuk lamah Khawzawl  tlawh lehin, a enkawl department hrang hrangte ram leh hmunhmate tlawhin a enfiah nghal dawn a ni.