3081/2022-2023

Dated Hmunzawl, the 16th December, 2022: Vawiin khan Pu Lalchamliana, Home Minister, Hrangturzo bialtu MLA ni bawk chuan a bial chhung khua Hmunzawl Community Hall thar, Rs 26 lakh senga sak a hawng.

A hawnna inkhawm tawi Community Hall thara buatsaihah Home Minister chuan, Hmunzawlin Hall thar tha tak mai, khaw laili hmunrem taka in nei hi ka lawmpui che u a, tangkai taka in hman ka beisei a ni. A mawiin a thianghlim hle mai a, fai leh duat taka lo enkawl zui zel turin ka ngen che u a ni. Classical Economist lar Adam Smith chuan, "mihring mamawhte hian tawpintai a nei lo" a ti a, duh leh mamawh tawp thei lo hian hmasawnna min thlen thung thin a ni. Chutihlaiin kan duh tinreng hi sawrkar atanga kan beiseia, kan phut erawh chuan sawrkar sum leh pai pawhin a daih seng bik lo thei a. Chuvang chuan khawtlang mipuite hian hmasawnna leh kan mamawh thil tam tak keimahni'n kan lo sual chhuahve theih a awm a, chung thilte chu theihtawpin i ngaihtuah ve thin ang u, tiin hmasawnna kawnga sawrkar thawhpui zel turin a ngen a ni. SEDP Family Oriented Second Instalment chu sawrkarin nakkum February ral hmaa pek chhunzawm leh a tum tih tarlangin, a thawhkhatnaa chhungkaw sing ruk kan sem mek bakah hian nakkum sawrkar kumtharah chhungkaw thar sing tel hnenah a thawhhnihna kan kalpui leh dawn a, a tul angin a thawhkhatna dawngtute pawh kan umzui zel dawn a ni, tiin sawrkar flagship programme kalpui zel dan tur pawh a tarlang a. Krismas leh kumthar hlim taka hmang turin duhsakna a hlan a ni.

He Hall thar hi a dung feet 60 niin a vang feet 30 a ni a, a Liang san zawng hi feet 20 niin, Rural Development sum Rs. 18 lakh leh a chhung, a chhehvel leh Toilet siam felna Rs. 8 lakh, MLA fund atanga an hmuh hmanga sak a ni.

A hawnna inkhawm hi Pu Lalnunmawia, VCP in a kaihruai a. Hmunzawl khuain kum sawm thum vel zet Community Hall kan neih tawh loh hnuin bialtu MLA Pu Lalchamliana hmalaknain Hall thar mawi leh tha tak kan nei ta a. Kan khawtlang kan hlimin kan lawm hle a ni, tiin Hall thar an neih vanga khawtlang an lawmthu a sawi a ni.