3082/2022-2023
Aizawl dated 16th December 2022: Vawiin khan Mizoram Science, Technology & Innovation Council (MISTIC) buatsaihin ‘National Mathematics Day 2022’ lawmna hun, Mizoram Rural bank Auditorium, MINECO ah hman a ni a; he hunah hian Dr. K. Pachhunga, MLA, Govt. of Mizoram chu khuallian niin, Pu Lalmalsawma Pachuau, Secretary, Planning & Programme Implementation Department chuan he hun hi a kaihruai a ni.
Khuallian Dr. K. Pachhunga chuan Mizo te chu Science and Technology ah rahbi thar kan kai zel thu a sawi a, Mathematics subject a hlawtlinna changte chawimawi an phu thu a sawi bawk. Pathian tih leh taimak chu malsawmna a dawnna anih thu te sawiin, tha leh dika kan hriat chu ti zel turin naupangte a fuih. Science & Technology lama Mizote tan lak kan ngaih tak zet thu sawiin, Mathematician leh Scientist kan tlem tulh tulh thu sawiin, hemi lama naupang te leh thalaite tan la zel turin a fuih bawk a ni. Result ringawt nilo in, application based a kal a hun tawh zia a sawi bawk. Mau chu miin fiamthu thawhnan hmang thin mahse a nuihzathlak loh thu sawiin, mau atanga thil chi hrang hrang siam theih awmte sawiin, Mizo scientist-te leh researchers-te chu mau lama hma lakna tur tam tak a la awm thu a sawi bawk.
Chairman Pu Lalmalsawma Pachuau, Secretary, Planning & Programme Implementation Department chuan lawmthu sawiin kalkhawmte chibai a buk a. Mathematics chu subject tlansan theih loh, kan nitin nuna tangkai em em a nih thu sawiin, Mathematics thiamte chu analytical skill nei tha an nih thin thu a sawi. Zirlaite chu tumruhna leh taimakna nei turin a fuih a. Zirtirtu thate, a huhova thawh hote, zirho thiamte chu thil tangkai tak anih thu sawiin zirlaite chu naupang tak ni chung pawha hnuhma tha tak an neih theih thu sawiin a fuih bawk.
Dr. Davy Lalruatliana, Scientific Officer, MISTIC leh Programme Co-ordinator ni bawk hnen atangin National Mathematics Day denchhena programme hrang hrang neih dan report ngaihthlakna neih a nih hnuin MISTIC leh Mizoram Mathematics Society (MMS) tangkawpte’n pawl 5, 8, 10 leh 12 zirlai naupangte tana he ni puala kumtina an buatsaih thin State Level Mathematics Competition-a tithate hnenah chawimawina thuziak leh tangkafai hlan an ni.
He hunah hian Mizorama science NGO hrang hrang te, Science Promotion Wing (SCERT) te, Mizoram Remote Sensing Centre te, Mizoram Science Centre te, Mizo innovators te leh sawm bik mi thahnem tak te an tel a; Dr. Lalhriattira Fanai, Assistant Professor, Lunglei Govt. College hnen atangin presentation ngaihthlak niin kal khawmten an hlawkpui hle a ni.
National Mathematics Day 2022 lawmna inkhawm kharna hun hi Er. H. Lalsawmliana, Chief Scientific Officer & Member Secretary, MISTIC, Directorate of Science & Technology chuan hmangin khuallian, Chairman leh MMS hotute bakah kal khawm zawng zawngte hnenah lawmthu sawiin a tin a ni.
