Home Minister Pu Lalzirliana chuan vawiin khan Govt. Hrangbana College Freshers' Social cum Farewell a hmanpui a; Hrangbana College (HBC)-in music video an siam chu a release a, HBC tan hian cooler lian chi 2 a pe bawk.

Pu Lalzirliana chuan Hrangbana College chu zirna in a ni tih sawiin zirlaite chu college dan zawm tha tur te, hotute thu awih tur leh nungchang mawi vawng nung turin a fuih a. Zirlaite tan thiamna hi incheina mawi leh changkang ber a ni tih sawiin tang mar pat tur leh lehkhabu leh classroom pawna thiamna tak tak neih tum turin a fuih bawk. Zirlai nih lai hi hmalam hun atana rahbi tuk hun lai a nih avangin rilru mumal tak put a tul a, zirna leh co-curricular activities inthlawp tha taka kalpui a tul tih a sawi bawk. HBC in library tha tak an neih chu hmang tangkai tur leh lehkhabu chhiar uar tur te, tawng dang thiam tuma hmang uar tur te in zirlaite chu fuihin degree naran aiin thiamna tak tak nei, chhawr tlak leh rawih tlak nih a pawimawh thu a sawi a. Mizoram chhungah ringawt hnain min daih dawn loh avangin ram pawn, India ram pawn thleng pawha chhawr tlak ni tura inzir chhuak ngei turin a chah bawk.

Pu Lalzirliana chuan India telna G-20 hi tunlai khawvela pawl pawimawh ber pakhat a ni tawh tih sawiin chutah pawh chuan India hi a hmahruaitu langsar a ni a ti a. India ram hi tun atanga rei loteah USA tluka dinhmun pawimawh luahtu a la nih a beiseiawm tih sawiin chu huna Mizoram dinhmun leh khawvelin Mizo hnam min hriat dan tur chu tuna Mizo zirlaite kutah a awm tih sawiin zirlaite chu khawvel pum huapa hmathlir neia ngaihtuahna seng turin a fuih a. Mizorama zirna siamtha turin zirlai leh zirtirtu te bakah nu leh pa te, khawtlang, Kohhran leh sorkarin tihtur kan nei theuh a, kan tanrual chuan Mizorama zirna kan siamtha ngei ang a ti bawk a ni.

HBC Golden Hall-a programme hmanah hian Hrangbana College Principal Pu K. Liantuala pawhin thu sawiin college chanchin tlangpui a sawi a. Semester system-a kal a nih tawh dawn avangin zirlaite chu inthlahdah lova tang mar pat turin a fuih a, nungchang tha neih a tul tih sawiin mi thiam, fel leh taima, ramin a chhawr tlak ni turin a chah a ni.

21st July, 1980 a ding tan HBC ah hian Arts leh Commerce zir theihin department hrang hrang 10 a awm mek a, 2006 khan National Assessment and Accreditation Council of India (NAAC) chuan B++ Accreditation a lo pe tawh a. Zirlai 1955 awmin zirna leh infiamna mai bakah co-curricular activity chi hrang hrangah Mizorama college langsar ber pawl a ni mek a ni.