Vawiin chawhma dar sawm khan Serchhip DC Conference Hall-ah Green Mizoram Day inkhawm tawi buatsaih a ni a, Serchhip District Bawrhsap thar Pu P. Lalchhuanga chu Khuallian a ni. He inkhawmah chuan khuallian chuan thu tawi sawiin nungchate humhalha enkawl that an pawimawh thu leh kan thlah lo la awm zel tur te tana khawvel nuam zawk leh ram leilung hausakna tam zawk hnutchhiah turin kalkhawm te a sawm a ni.

Khuallian chuan Thingkung pawimawhna sawiin, nunna petu a ni a, tui a thlifimin tui hna a siam a, a chhek khawl bawk a ni a ti a. Nungchate leh thing leh maute kan tih rem zel avanga khawvel lo lum chho zel leh thlaler ram ro lo pung zel hian, chenna tlak khawel a tizim nasa sawt em em tawh a. Chuvangin keini leh kan tu leh fate dam khawchhuah nan leh khawvel nuam zawk kan neih leh theih nan nungchate hi duat takin enkawl ila, thing leh maute phun belh zelin, phunsa pawh uluk leh duat takin enkawl zel ila khawvel nuam zawk i din thar leh ang u a ti.

Faina chungchang pawh sawiin khuallian chuan engmah hi amah ngawta bawlhhlawh a awm lova, thil a awmna tur ni lova awm hi bawlhhlawh chu a ni mai tiin, thil engkim hi a hun leh hmunah dahin paih ila, kan thianghlim nan leh kan hrisel nan a pawimawh a ni a ti. Tin thil hman zawh tawh hman nawn leh (recycle) hi leilung tha chakna renchemna tha tak a ni a, chuvangin bawlhhlawh leh tangkai lo nia kan hriat tam tak hi energy renchem nan kan phak tawk tawkah hman tangkai I tum ang u tiin a sawi bawk.

Serchhip District Level Committee on Green Mizoram Day chuan kumin hian Serchhip district chhunga department hrang hrangte leh NGO te chu Group 10-ah thenin, he inkhawm tawi zawhah hian sawrkar office leh vantlang hmun pawimawh hrang hrangah thing chi hrang hrang an phun a ni. Tin kumin Green Mizoram Day-ah hian  thupui hran an nei a, "A tam lam ni lovin, a enkawl that lamah zawk le" tiin group hrang hrangte pawh hi thing tiak 30 theuh chauh pek an ni a, uluk taka enkawl tura inzirtirin nakum Green Mizoram Day-ah endik a lawman sem leh tur a nih thu an sawi bawk.

He Green Mizoram Day hmanna-ah hian nikum lama mahni thing phun enkawl thate hnenah lawmman sem a ni a, Thing tiak 120 phun a 90 phun nungtu Sub Headquarter YMA te chu pakhatna an ni a, PCR High School, New Serchhip chuan pahnihna lawmman an dawng bawk.