Home Department leh ICT Department-te hmalaknain ILP Portal thar chu peihfel a ni ta a. Vawiin khan Home Minister Pu Lalchamliana chuan GS Arya Mess, Police Headquarters-ah a hawng. He programme-ah hian ICT Minister Pu Robert Romawia Royte chu khual zahawm a ni. Portal hawn thar tak hmang chauh hian ILP - Temporary leh Regular-te pek chhuah tawh tur a ni dawn a. Portal thar peihfel a nih rual hian mipui leh NGO te hman tur ILP Mizoram mobile app siam tel a ni a. Police duty-te hman tur ILP Enforcer mobile app siam a ni bawk. Heng apps te hi Google PlayStore ah download mai theih in a awm a, iOS version pawh siam fel ni tawhin AppStore ah dat vat tum a ni.

Home Minister Pu Lalchamliana chuan Online ILP hi Mizoram mipui te him nana Sawrkar in a duan a nih thu sawiin, a buaipuitute chungah lawm thu a sawi a, Mizoram tan ni chhinchhiahtlak tak a ni, a ti. ILP chungchangah sponsor-tute, ILP hmangtute, a check tute leh a buaipuitute pawhin a nihna angin leh dan anga tih loh a awm thin avangin harsatna kan tawk thin, a ti a. Online kaltlang erawh hi chuan sponsor tu in a sponsor-a kha a chhawrna turah a chhawr ngei em, a chhawr zawhah khawiah nge a thang tih te a hriat theih tawh dawn avangin sponsor tute pawhin kan uluka kan fimkhur a ngai tawh dawn a ni, a ti. ILP hi hnam dang ten min chim ralna lak atanga kan inhumhimna tur ki pui pawimawh tak a nih avangin mipuite kan vaiin tang tlang ila, dan hnuaiah kan tihtur te ti thlap zel turin kan ngaihtuahna i hmang ang u, Home Minister chuan a ti.

Portal tharah hian Sponsor-tu te bio-data kimchang zawka pek a ngai tawh dawn a, sponsor tu reng reng-in EPIC No. hmang chauhin hnam dang an sponsor thei tawh dawn a ni. Sponsor theih zat pawh system hian a ven tawh dawn avangin sponsor tu ten kan mi chhawr(sponsor) te ngaihven zui leh an haw leh ngei em tihte thlenga ngaihven a tul tawh dawn a ni. Mizoram chhunga hnam dang lo lut tur ILP ngai chi reng reng ten ILP an lak hnuah an haw leh dawnah Checkgate-ah in-report leh zel tur a ni dawn a, hei hi Mizoram an chhuahsan leh ngei tih chhinchhiahna kawngah a pawimawh dawn a ni. ILP pass holder dan loa Mizoram chhunga awm chhunzawm reng te chu an mahni mai bakah a sponsor-tu te thlengin harsatna a siam chho thei tawh dawn a ni.

Tun hmain ILP lem hmangin hnam dang Mizoramah an lo lut thin nia hriat a ni a, hei hi sawrkar pawhin a ngaimawh hle a, he portal thar hmang hian a check-na tur mobile app - ILP Mizoram siam a ni a, hei hi mipui ten hmang tangkai turin Home Department chuan mipuite a sawm a. ILP issue thar reng rengah chuan A4 Size (Detail) leh ID Card pek tel an ni tawh dawn a, heng pass issue ah te hian QRCode (Quick Response Code) dah tel a ni a, he QRCode hi ILP Mizoram app hmanga scan hian ILP lem leh tak chu a hriat theih dawn a, QRCode scan nan hian mobile apps dang hmanglo turin mipuite Home Department chuan a hriattir a ni.

Portal tharah hian mipuite hmuh mai theih turin ILP - Temporary leh Regular issue zat dahchhuah a ni a, heng report mai bakah district ang zawnga issue zat enna te pawh mipuite hman tura pho chhuah a ni bawk. Portal thar hi ilp.mizoram.gov.in ah tlawh theih a ni.Portal thar hian hmasawnna hrang hrang a rawn ken tel rualin hmabak tih ngai te pawh a la awm a, heng ILP Online a apply mai na turte leh report kimchang zawk mipuite hnenah pek theih hi tunah hmalakna tur la chhawpchhuah langsar deuh te an ni bawk.