Vawiin khan Govt. J.Thankima College chuan an college zirlai lut tharte pualin Chanmari YMA Hall-ah Freshers’ Social an nei a. Home Minister Pu R.Lalzirliana chu Khuallian a ni.

Zirlaite fuihna thu sawiin Pu Lalzirliana chuan mi hlawhtling ni turin ‘background’ tha a pawimawh ber lova, tawrhna tel lovin hlawhtlinna a awm thei lo, a ti a. Tunlai Mizoram khawvelah thuneitute palzutna a tam tih sawiin Pu Zira chuan hei hi a vei thu a sawi a. Zirlai te zingah zirna aia thil dang buaipui zawk te, hamthatna zawnga politics thlenga inrawlh ching an awm thin chu pawi a tih thu sawiin zirlaite chu rilru mumal leh tum bulbal tak nei a, ram tan chhawr nahawm ni tura an zirna ah rilru pe tlat turin a fuih a. Zirlai te tan thuamhnaw aiin an incheinna mawi leh changkang ber chu zirlai an thiamna a ni, a ti.

He function ah hian J.Thankima College Principal Pu Ramhmangaiha Ralte pawhin thu sawiin he college lo indin tan dan leh tuna a a dinhmun tlangpui a tarlang a. J.Thankima College hi kum 1992 khan din niin kum 2005 khan Lalhmingthanga College, Durtlang nen chhun finin Deficit College ah hlan a ni a. Kum 2007 October ah sorkar-in a la a. Tunah hian zirlai 700 chuang awmin Mizoram-ah University exam a pass percentage nei tha ber college zinga mi a ni.