Nimin khan Home Minister Pu R. Lalzirliana chuan Keifang Joint YMA in an buatsaih 'YMA Platinum Jubilee leh YMA Day Lawma' chu Khuallian niin a hmanpui a. Jubilee lawmnaah hian Pu K. Lalnithanga, MLA Serlui Bial chuan a telpui bawk a ni.
Pu R. Lalzirliana chuan YMA-in kumin Thupui-a an hman 'Khawtlang Nun Siamthat' tih leh ruihhlo tihrem kawnga an hmalakna chi khat Central Anti-Drugs Squad (CADS) an din chu fakin, ram leh khawtlang nun siamthat kawngah YMA ke pen chu mitinin thlawp vek se a duh thu a sawi a. YMA chu thawhlawm khawn lova pawl lian ber ni thei leh ram leh hnam tana YMA hnathawh chu ropui a tih thu Minister chuan a sawilang bawk.  Minister chuan taimakna tel lo chuan intodelh thei a ni lo tiin thalai kalkhawmte chu taimakna leh Zonunmawi chu  mahni nuna seng lut theuva, thatchhiatna chu an nun atangin umbo turin a chah. Minister chuan thalaite chu mahni nun theuh enchian a tul thu sawiin, AIDS lakah te, zu leh ruihtheihthil lamah te leh mahni nun kawnga fimkhur turin a chah bawk a ni.

Minister leh MLA hian Community Hall compound chhungah hian YMA Platinum Jubilee pualin thing an phun bawk a ni.