Nimin khan Hon'ble Mr. Justice Altamas Kabir, Judge Supreme Court of India leh Executive Chairman, National Legal Services Authority (NALSA) chu zan khat riakin Aizawlah a lo kal a. Nimin tlai vek khan Justice Altamas Kabir leh Pu Lal Thanhawla, Mizoram Chief Minister ten Tourist Lodge Chaltlangah Legal Awareness and Inter Departmental Conference, National Legal Services Authority leh Mizoram State Legal Services Authority te buatsaih an hmanpui.

Conference ah hian Justice Altamas Kabir chuan Supreme Court Judge a nihna leh National Legal Services Authority (NALSA)-a Executive Chairman a nihnain Mizoram a rawn tlawh tih a sawi a. Tun dinhmunah hian India rama judiciary hi a tha tawk lo a, thubuai (case) chinfel loh inkhek a tam lutuk tiin chak zawka chingfel turin  Alternate Dispute Redressal kan mamawh tawh a ni a ti a, chutiang kan neih theih nana hma la tur chuan mipui te, NGO te an pawimawh hle a ni a ti bawk. Dan hmaah mi zawng zawng kan intluk vek a, mitinin an dikna leh an chanvo an hriatnan a tanpui tur leh an harsatnate sutkian a nih theihna turin Lok Adalat te, Mediation Center leh Legal Aid Clinic te hi a tam thei ang ber din a tul a ti a. Court-a thubuai tam zawk hi chu awlsam zawkin Lok Adalat ah te chinfel mai theih a nih thu leh chutianga tih chu tha a tih thu a sawi a ni.

He conference ah hian Pu Lal Thanhawla Mizoram CM chuan dan leh hrai chungchanga Mizoram sawrkar hmalakna hrang hrang te sawi langin India hmarchhakah Mizoram chu separate judiciary nei hmasa ber kan nih bakah India Danpui 6th Schedule hnuaiah Autonomous District Council ah te pawh kalpui tawh a nih thu te, Aizawlah mediation Center din a nih tawh thu te, District headquarter pali ah Family Court din a nih tawh thu te, District zawng zawngah District Legal Sevices Authority din a nih tawh thu te a sawi a. Mizoramin tunah hian eirukna te, damdawi hmansual leh dan lova sumdawn nana hman te, naupanga sumdawn (child trafficking) te, Bangladesh leh Myanmar atangte a dan lova lo lut thin te dan nan judiciary chak lehzual, thiltha duh tak tak leh thawk tha kan mamawh a ni a ti bawk. CM chuan India Danpui Article 247 in a sawi angin Union Law leh State Law atan te court hran ve ve neih a tha a tih thu te sawiin chu chuan tuna harsatna lian tak kan tawh mek -  court in case a chingfel chak tawk lo leh infrastructure atana fund indaih tawk lo te chu  a sutkian a beisei thu a sawi a. 13th Finance Commission remtihna angin State Judicial Academy din a ni dawn a, dan leh hrai hriatna lama hmasawnna nasa tak thlentu a nih a beisei thu a sawi bawk.

Conference ah hian Pu Chawngtinthanga, Parliamentary Secretary leh Mrs. Minna Kabir, Child Rights Activist te pawhin thusawina hun an hmang a, inkhawm ah hian Justice H. Baruah Judge, Gauhati High Court &  Executive Chairman, Mizoram State Legal Services Authority chuan welcome address a sawi a ni. Conference hi Cultural Programme leh State Dinner in a zui nghal.

Tukin khan Raj Bhavan-ah Mizoram Governor Lt. Gen (Retd) M.M. Lakhera, PVSM,AVSM,VSM leh Justice Altamas Kabir te hian inkawmna hun tha tak an hmang bawk.