Vawiin khan Mizoram hmundangte ang bawkin Saitual leh Keifangah te pawh Joint YMA ten anmahni pualin programme an buatsaiha; heng hun te hi Home Minister Pu R.Lalzirliana chuan khuallian niin a hmanpui ve ve a ni. YMA Day vawi 83 -na programme hi Keifang Joint YMA te chuan Keifang Community Hall-ah an hmang a, Saitual Joint YMA te chuan an din champha vawi 25-na pualin Silver Jubilee celebration, Saitual Auditorium-ah an hmang thung a ni.

Keifang leh Saitual a YMA Day lawmnaah Home Minister Pu R.Lalzirliana chuan YMA chu a din tirh atanga tun thlengin tlawmngaihna vawng nungtu leh tanpui ngai te tanpuitu a la ni chhunzawm reng tih a sawi a. Mizo tlawmngaihna chu mi thenkhat ten a dal tawh angin sawi thin mahse, YMA zarah a la dal lo a, chhiattawk leh tanpui ngai te an an awm nikhuaah te kawng tam takin a la hmuh theih a ni a ti. "Tlawmngaihna kawngah pi leh pute hunlai ai khan kan nep chuang loa, pi leh pute hun laia tlawmngaihna tela thil harsa tih ngai te kha hun inthlak danglam zelah hmasawnna tam tak a lo awm tak hnuah remchang zawk leh awlsam zawka tih theih a lo ni ta mai zawk a ni. Tunah hian kan thalaite hian khang kha an tih ve ngai ta se an ti duh vekin ka ring a, an tih theih vek pawh ka ring a ni. Mahse, aia upa te zah kawngah erawh kan tlachhe tak zet a, YMA ang pawhin kan thangthar rual ten aia upa zah an thiam leh na turah tan lak a ngai te pawhin a lang a ni", a ti.

Home Minister chuan "YMA thupui - ram leh hnam humhalh tih hi mahni kutkea ding leh mahnia ro inrel hrang kan nih si loh chuan kan kumkhaw kumpuan thupui a nih reng a ngai dawn a ni. Hnamdang leh kan chhehvel a mi tawngpawng huat ngawt, hriamhrei lek leh tharum thawh rilru put hi ram leh humhalhna atan a tlak lo a ni. Chu ai chuan thluak leh thiamnaah midang chunga leng kan nih a ngai a; Chief Secretary, DGP, Bawrhsap leh SP leh sawrkar hna pawimawh zualah te hnamdang hlir an awm chhung chuan ram leh hnam humhalhna kawngah kan hnufum fo lo thei lo a ni. Kan thalai te hian UPSC exam leh Central Service tam takah an inziahtlin theih tawh lohnaah te in enfiah se a tha a, hemi kawngah hian kan vaiin tan tlan a ngai a ni", a ti. Mizoram hmangaihtu leh siam tha thei chu Mizote an ni a, ramngaw chereu siamtha tur te, ransa lo tlem zel an inthlahpun leh theihna tur atan pawh Forest Department hmalakna chiah a tawk lo a, Mizo mipui ten kan za a hma kan lak a ngai tih a sawi a. Ramsa pembo ta te kokir leh tur te, luia nungcha te an inthlahpun leh theihna tur te chuan mipui ten an zir a ngai hmasa a. YMA Day-ah hian ramngaw leh nungcha humhalh te pawh ram leh hnam humhalhna kawng khat a ni tih hriatthar leh a hun tak zet a ni a ti.

Keifang Joint YMA ten YMA Ni puala programme an buatsaihah hian intihhlimna hun leh Lengkhawm Zai intihsiakna hun te buatsaih a nia. Mi tlawmngai thisen pe tam zual pathum - Pu Hmingthanzauva, thisen vawi 40 pe tawh, Pu Lalnunsanga, thisen vawi 28 pe tawh leh Pu Lalremruata, thisen vawi 27 pe tawh te hnenah chawimawina hlan a ni a, kumina MBSE Examination 2018 Result chhuak a pawl 10 leh 12 passed chhuakte hnenah lawmpuina hlan a ni bawk a ni. Keifang Joint YMA-ah Branch pathum awmin tunah hian member 1025 an awm mek a. Nikum chhung khan Joint YMA angin Mizoram pumpuiah thisen pe tam ber niin Unit 164 an pe a; MSACS leh AVBD te hnen atangin chawimawina an dawng a ni. YMA Day pualin Saitual Sub Division Hospital tan poor fund ah Rs 3000 an chhung lut a. YMA Day programme tan hma hian Keifang Joint YMA Library, bialtu MLA Fund kaltlanga Rs 3, 00, 000/- senga sak chu Home Minister Pu R.Lalzirliana, bialtu MLA ni bawk chuan a hawng nghal a ni. Saitual Joint YMA ten Silver Jubilee an lawmnah hian Silver Jubilee puala Souvenir buatsaih chu Home Minister Pu R.Lalzirliana chuan a tlangzarh a. Silver Jubilee pual hian Saitual Joint YMA hnuaia Branch YMA pathum te chu sum leh a remchan dan angin miharsa zawkte leh chhawmdawl ngai te tanpuiin an luangchhuak bawk a ni. YMA Day pual hian Home Minister Pu R.Lalzirliana chuan tlawmngai pawl anga diltute hnenah Computer set 4 leh Oxygen concentrator 2 a hlan a. YMA Day programme zawhah Saitual Mini Shopping Mall sak mek a tlawh nghal bawk a ni.

Attachment

  • Loading attachment...