Aizawl Traffic S.P chuan ahnuai ami ang  hian thuchhuah a siam :

Aizawl District Disaster Management Authority leh Hunthar Veng Local Council te thurawn angin Hunthar Venga Pi B Sairengpuii (L) In kawmthlang lam Leimin avanga dinhmun hlauhawm taka awm mek chhungkua engemaw zat in leh lo humhim a nih beiseina avang leh kawng hmangtu te himna turin Hunthar, Chanmari West Junction leh Company Peng inkarah lirthei LMV (407) chin chung lam tlan dan tihdanglam a ni a. Chumi avanga hmun danga lirthei tlan dan tur pawh a hnuai a mi ang hian siam rem a ni a, he kawngpui hmangtu mipui ten thuawi taka zawm tur leh he thupek bawhchhia te chu dan anga mana hrem tur an ni ang.

Hunthar, Chanmari West Junction leh Company Peng inkarah lirthei LMV chin (407 Truck leh a chung lam huam lovin) a hmaa lirthei tlan dan pangngai angin an tlan thei ang. 407 Truck leh a chung lam lirthei lian te chu helai kawngpuiah hian an tlan phal a ni lo.

Temple to Vaivakawn ah 407 Truck leh a chung lam Motor lian chhuk leh chho zawnga tlan a ngaih dawn avangin zan dar 8:00 Pm leh zing lam dar 7:00Am inkarah Motor eng chi mah Vaivakawn leh Temple Square inkar kawngpui dungah dah/park phal a ni lo.

Temple to Vaivakawn inkara 407 Truck leh a chung lam Motor lian tlan dan tur chu hetiang hian ruahmanna siam a ni.

Vaivakawn to Temple tlan theih hun dar 9:00 Pm – 2:00 Am leh Temple to Vaivakawn Dar 2:30 Am to 6:30 AM.

407 Truck te chu a hmaa tlan dan tur ruahman angin hun bi tuk chhungah hian helai kawngpuiah hian an tlan thei lo ang a, zing lamah 8:00 Am to 10:00 Am leh tlai lamah 4:00 Pm to 6:00 Pm. Hunthar Veng Leitlahniam laiah hian lirthei te in tlan chhawk (One way System) hman a ngaih dawn avangin lirthei (LMV, 407 Truck chin chung lam tiam lovin) te chu Ramrikawn to Lungverh Peng via Sakawrtuichhun lam hmang uar tur in kan in ngen a ni.

Ramrikawn leh Lungmual lama Truck ruak Sairang lam pan turte chuan Vaivakawn kal tlang lo in dar 8:00 Pm – zing dar 8:00 Am inkarah Ramrikawn to Lungverh road via Sakawrtuichhunah a tlan theih ang.

Ramrikawn FCI Godown-ah Mizoram mamawh Buhfai chhek khawl runpui neih mek a nih avangin leh hetianga kawng dinhmun a that tak loh avangin Ramrikawn leh a chhehvelah loh theih loh in Truck lian thenkhat din a tul dawn a, chuvangin he kawng hmangtu lirthei khalhtu te leh mipui ten hriatthiamna zau tak kan neih a tul dawn a, chutih rualin Truck khalhtu te pawh kawngsira lirthei hun chungchangah mipui vantlang harsatna thlen lo thei ang ber a in siam rem tura beisei kan ni.

He hriattirna hi ni 15.6.2018 zan dar 10:00 Pm atanga a chunga sawi leitlahniam hlauhawm lai siam that a nih hma loh chuan hman tur a ni ang a, a tul anga tih danglam theih a ni bawk ang.

He thupek hian chhiatrupna thil kang mei leh emergency kaihhnawih a dan leh thupek pawimawh bik a duty-te chet velna a huam lovang.

He thupek hi a tul dan a zirin traffic police a hmuna duty ten an tidanglam thei ang a, a tul angin siam danglam leh theih a ni.