Bungtlang 'S'-a Baptist English School (BES) building thar chu AH & Vety Minister Pu C. Ngunlianchunga'n nimin piah khan a hawng.

Sikul building thar hawnna inkhawm buatsaihah Pu C. Ngunlianchunga chuan tunlaia ruahsur nasa avanga Mizoram hmun hrang hranga leimin leh tuilian tuara chhiat tawkte a tuarpui thu sawiin, an tana tawngtai turin kal khawmte chu a sawm a. BES Bungtlang 'S'-in sikul building tha tak an nei thei chu a lawmpui thu sawiin, an kal zelna turah duhsakna a hlan a. Managing Board-in sum tlem te chauh nei chunga hna tha tak an thawk thei chu an fakawm hle a ni tiin, hma sawn tak tak tur chuan hna thawh that intihhmuh a, inel nan hman a pawimawh a ni, a ti. Zirtirtute chu mahni thiamna mi dang tana luan chhuahtirtu, naupang thang laite'n an entawn ber an ni a, ram siamna kawnga an dinhmun pawimawhzia hria a, zirlaite kawng dik kawhhmuhtu leh an tana entawn tlak nih tum tlat turin a chah bawk.

He hun hi sikul Principal Pu Lalhunmawia'n kaihruaiin, sikul report a pe nghal a. School Managing Board Chairman Upa B. Hmunthanga'n hunserh hmangin, Vice Chairman Upa JF Rozawna'n thu tawi a sawi a. Zirlaite atangin special item hmuhnawm leh ngaihnawm tak tak en leh ngaihthlak niin, zirtirtute zinga mi Johan Lalanpuia'n lawm thu a sawi a. Hla sak ho niin, Lal tawngtaina nen hun tihtawp a ni.

Nimin piaha hawn tak BES Bungtlang 'S' building hi bialtu MLA Pu C. Ngunlianchunga'n LAD Fund Rs nuai 3 a pek leh mi thahnem ngaite sum thawh belh hmanga sak a ni a. A dung fit 108 leh a vang fit 16-a zau niin, pindan 12 a awm a. RCC-a sak niin, a chung rangva, a bang dap a ni.

BES Bungtlang 'S' hi kum 2015 khan din niin, a kum 4-na an kal mek a. Nursery atanga Class-VIII thleng awmin, tunah hian zirlai naupang 165 leh thawktu 12 an awm.

Pu C. Ngunlianchunga hi a nupui, Pi KR Chhingpuii leh LADC-a executive member-te, Congress party hruaitute leh officer thenkhatin an tawiawm a ni.