Disaster Management & Rehabilitation (DM&R) Minister Pu C. Ngunlianchunga chuan June ni 4, 2018 (thawhtanni)-a Lunglawna khuarel chhiatna thlenga nunna chan Bungtlang 'S' khaw mi panga chu nimin piah khan an chenna inah a ral.

He chhiatna thlenga Bungtlang 'S' khua atanga nunna chante hi Pu Thatlina (kum 67), Pi Darpawngi (kum 66), Laldinpari (kum 37), Remlalfamkima (kum 14) leh Cindy Lalhlunmawii (kum 4) te niin, chhungkaw khata mi vek an ni a. Pu C. Ngunlianchunga chuan sawrkar atanga ralna Rs nuai 20 cheque leh ama pawisa atangin Rs 5000/- chu Pu Thatlina (L) fapa Pu Lalfela kutah a hlan a ni. Khuarel chhiatna avanga nunna chante ralna hi mi pakhatah Rs nuai 4 zelin sawrkar chuan a pe thin a ni.

He hunah hian Pu C. Ngunlianchunga hi a nupui, Pi KR Chhingpuii leh LADC-a executive member Pu C. Lalneihkhuma leh Pu JC Ngurluaia te bakah, Congress party hruaitute leh officer thenkhatin an tawiawm a ni.