AH & Vety Minister Pu C. Ngunlianchunga chuan nimin piah khan Diltlang 'S'-ah Community Hall leh Supply Godown thar a hawng.

Hemi puala inkhawm buatsaihah Pu C. Ngunlianchunga chuan Mizoram hmun thenkhatah leimin leh tuilianin chhiatna a thlen mek laia DM & R changtu Minister ber programme danga chhuah a ngai chu hrehawm a tih thu sawiin, Bungtlang 'S', Diltlang 'S' leh Chawngte 'P'-ah te hun rei tak atanga programme lo duan lawk tawh, thulh rem tawh si lo a awm avanga kal tlangpui a nih thu a sawi a. Leimin leh tuilian tuarte a tuarpui tak zet thu sawiin, anmahni tawngtaipui ve turin Diltlang khaw mipuite chu a sawm nghal a ni. Ni khat thil thua Diltlangah Community Hall thar leh Supply Godown thar hawn a ni chu Diltlang khawtlang vanneihna a ni tiin, sawrkarin duhsak taka a pek vantlang thilte chu mahni ta anga uluk taka enkawl chu mipuite bat a ni, a ti a. Ramin chak taka hma a sawn mek laia hnufual bik nih tum lo tur leh, hma sawnna kawnga thawh neih ve tum tlat turin khawtlang mipui leh zirlai kal khawmte chu a chah a. General English zirna bu 1 & 2 chu pawl sawm leh sawmpahnih pass tharte hnenah a hlan nghal bawk.

He hun hi Diltlang 'S' VC member Pu Kapchungnunga'n a kaihruai a. Community Hall sak hna thawktu Lawngtlai BDO Pi Carolyn LB Khiangte MCS chuan hall sak a nih dan leh sak zawh a nih thlenga an hma lak dante a sawi a. Diltlang 'S' VCP Pi Tlanghmingthangi'n lawm thu sawiin hun a khar a ni.

He hunah hian Pu C. Ngunlianchunga hi a nupui Pi KR Chhingpuii leh LADC-a executive member thenkhat te, Congress party hruaitute leh officer thenkhatin an tawiawm a ni.

Diltlang 'S' Community Hall hawn tak hi concrete building, a dung fit 80 leh a vang fit 40-a zau niin, kum 2011 khan BRGF sum Rs nuai 20 hmanga bul tan a ni a. Kum 2016-17 BADP sum Rs nuai 10 hmanga chhunzawm niin, hawn theiha sak zawh a lo ni ta a ni.

Supply Godown hawn tak hi a dung fit 50, a vang fit 30 leh a san zawng fit 15 niin, NABARD sum atangin kum 2016 khan sak tan a ni a. Tunah hian buhfai chhek khawl nan pawh hman tawh a ni.