Vawiin khan Home Minister Pu R Lalzirliana chuan a bial chhunga hmun hnih ah YMA Day lawmpuina programme a hmanpui a. Zing lamah khan Venghlun Branch YMA, Keifang ten YMA Zawlbuk-ah YMA Day lawmna programme an buatsaih chu hmanpuiin chawhnu lamah chuan YMA Day lawmna programme Tlangnuam(Thingsul) Branch YMA ten an buatsaih leh an YMA Branch kum 40 tlin lawmna Ruby Jubilee, Community Hall-ah an bautsaih chu a hmanpui ve thung a ni.

Venghlun, Keifang, YMA Zawlbuk a thu a sawi naah Home Minister Pu R Lalzirliana chuan YMA chu ram leh hnam ti mawitu, a chhe lai siam thatu a ni a, YMA chu Sawrkar leh vantlang thil te chu mahni ta anga an en thin avangin heng thil YMA enkawlna hnuaia sak ah te hian Sawrkar sum chu a daihzai thin a ni, a ti. Thalai kalkhawmte chu thing leh mau leh ramngaw humhalh tura chahin ram ngaw kan humhalh that loh chuan Mizoram hi thlaler ramro ah kan siam ang tih a hlauhawm a chuvangin tunah ram ngaw kan neihsa te hi ti chereu lova a aia tha zawk siam a pawimawh a. YMA hian ram ngaw humhalh nan tha leh zung a sen leh a inpekna hi a ropui a, ram ngaw venna kawnga YMA hi a pawimawh em em a ni, a ti. Thil tha a chuan huaisen taka Sawrkar hma lak pui tura YMA chu sawmin Mizo nunzemawi chawi nunga aia upa zahnate, tlawmngaihna te leh mi harsa tanpui chu vawngnun zel turin YMA member kalkhawmte chu a chah a ni.

Thingsul Tlangnuam Community Hall-ah YMA lawmpuina programme ah Home Minister chuan YMA member te chu a tul anga ram leh hnam tana volunteer in pe an ni tih hriat a pawimawh thu a sawi a. Ram leh hnam humhalh tur chuan nangni leh keini bak an awm lo a, hemi atana pawimawh ber chu hnam dang huat emaw a nilo a, kawng engkima intodelh a, midang ban loh tura insiam hi a pawimawh ber a ni a ti. Hnam inpumkhatna tha tak neih a pawimawh thusawiin Lai, Mara leh Paihte hi hnam dang anga kan en tur a ni lo a, Zo hnahthlak vek an ni a, Mizo II emaw Mizo nilo anga kan ngaih erawh chuan Zo hnahthlak inpumkhatna kan tichhia ang tih a hlauhawm a ni, a ti bawk.

Home Minister chuan sualna chi hrang hrang te hi khawvel changkanna in keng tel a, sualna hi kan umbo vek dawn loh anih tih hriat a pawimawh rualin a do inthlahdah emaw sual zalen tir tur emaw ani chuang lova, sualna awm mek te tih reh kan tum tur a ni, a ti.

Pu R Lalzirliana hian Thingsul Tlangnuam atanga HSLC leh a chunglam pass thar te lawmpuina thilpek Branch YMA in an buatsaih chu zirlai 33 te hnenah a hlan bawk a ni.