Vawiin khan Environment & Forest, Labour & Employment, etc. changtu Minister Pu Lalrinmawia Ralte chuan Kanghmun ah YMA Day lawmna a hmanpui a. Minister hi Department hrang hranga officer pawimawh ten tawiawm in, Kanghmun leh West Lungdar a E&F Department hmalakna hrang hrangte a tlawh nghal bawk.
Kanghmun Govt. Primary School-a YMA Day lawmna hunah hian Minister Pu Lalrinmawia Ralte chuan ramngaw humhalh kawnga hmalak thar a pawimawhzia sawiin, ram leh hnam hmangaihtu chuan tu leh fate hma ngai miahlo in mahni nawmsak leh chakna phuhru turin ram a tichereu ringawt lovang, a ti a. Zirna chungchang sawilangin Minister chuan zir thui mai bakah ngaihtuahna hmang thiam turin thalaite a chah bawk a. India ram pum hi kan ram anih angin Mizoram pawna kal pawhin mikhual anga inngailo turin kalkhawmte chu a chah a. Mizoram pawn dai hrehlo tan chuan hna tha tak tak hmuh theihna tur training pek theih zel a nih thu Minister chuan a sawi bawk.
He huna thu sawitu dang Pu Liankima Lailung, IFS, CF (Northern Circle) chuan ramngaw humhalh leh heng ramngaw leh nungchate hi hlut thiam turin kalkhawm mipuite chu a chah bawk a.
Pu J.T Vanlalngheta, Mizoram Youth Commission Secretary hnen atangin eizawnna atana thiamna tih hmasawn (skill development) chungchang ngaihthlak a ni a. Pu Francis Lianmawia, Asst. Welfare Commissioner, Labour, Employment & Industrial Training Dept. chuan Labour Welfare chungchang inhrilhriatna a hmang bawk.
YMA Day lawmna inkhawmah hian Mamit District chhunga kangmei ven kawnga tithate hnenah lawmman sem a ni a. Lawmman pakhatna hi Chungtlang hnenah hlan a ni. Kanghmun atanga HSLC leh HSSLC pass thate hnenah lawmpuina thuziak (citation) hlan a ni bawk.
Kanghmun Branch YMA in Vaisam Tlang leh a chhehvel humhalh kawnga an thawhrim leh inpekna avanga lawmthu sawi nan leh tanpui nan E&F Dept. chuan cheng sing li (Rs. 40,000) a hlan bawk a ni.
