1794/2023-2024

Khawzawl, 8th September 2023: Vawiin khan Home Minister Pu Lalchamliana chuan 2nd IR Batallion hmunpui Khawzawl Lungvar Veng ami chu a tlawh a. 2nd IR hotu ten Home Minister hi lo dawngsawngin, inkawm khawmna hun tha tak an nei.

Home Minister chuan 2nd IR Batallion in an lo dawnsawnnaah lawmthu a sawi a. Mahni hna rinawm taka thawh chu zahawmna a ni tih hre reng turin a chah. Mihring indaihloh chung pawha Mizoram Police ten hna tha taka an thawk thin chu fakawm a tih thu sawiin, a bikin Aizawl Traffic Police leh Cyber Crime Police-te chuan state dangte khaikhin pawhin hna an thawk tha tak zet a ni, a ti.

Police indaihlohna hnawhkhah tumin sawrkarin theihtawp a chhuah a, hripui lengin harsatna a thlen avangin duhthusamin post ruak hnawhkhah theih ni lo mahse compassionate appointment atanga lak mi 290 in training an nei mek tih Home Minister hian a tarlang a. Buarpuia tawhsual tawk havildar pahnih chhungte pawh hna pek an ni dawn tih a tarlang bawk.

Taxation Minister ni bawk Pu Lalchamliana hian nimin khan CYMA General Conference neihna tur Biate a tlawh a, Khawzawla hun a hman zawh hian Saitualah ‘Deputy Commissioner of State Tax Office’ a hawng dawn a, karleh lamah Hnahthialah ‘Deputy Commissioner of State Tax Office’ hi a hawng leh bawk ang.

He hunah hian 2nd IR Batallion Commandant Pu Saidingliana pawhin thu sawiin Home Minister-in a an Batallion hmun a tlawh chu lawmthu a sawi a. 2nd IR Batallion chanchin leh hnathawh hrang hrang te sawiin, an thil mamawhte Home Minister hnenah hian a thlen nghal a ni.

2nd IR Batallion hi  Mizoram Police hnuaia Armed Batallion 5-na ni turin January ni 15, 2001 khan din a ni a. Tuna an awmna Khawzawl Lungvar Vengah hian April ni 5, 2005 atangin an awm tan a. Tun dinhmunah hian Commandant Pu Saidingliana kaihhruaina hnuaiah mi 465 vel zet an awm mek. 2nd IR hian hmun sawm panga - Khawlian BOP, Suangpuilawn BOP, Vanbawng BOP, NE Khawdungsei BOP, Champhai PS, Khawzawl PS, Saitual PS, Zokhawthar PS, Dungtlang PS, Ngopa PS, SBI Champhai, District Court Champhai, Khawzawl Link Office bakah Tuivai leh Mimbung Temporary Post-ah te venhimna hna an thawk mek a ni.