1795/2023-2024

Dated Serchhip, the 8th September, 2023: Vawiin khan Health Minister Dr R Lalthangliana chuan Serchhip tlawhin Serchhip District Hospital leh Health Department hmunhma a enfiah a ni.

Dr R Lalthangliana chuan Serchhip District chhungah hmasawnna hmuh tur tam tak a awm a, chutihrualin tan lak tulna lai eng emaw zat a la awm tih a sawi a. Hriselna kawnga hma laknaah sawrkar leh thawktute chauh tih theih a ni lo va, mipuite nen tang ruala hma lak a tul a ti a. Sawrkar chuan hriselna a ngai pawimawh a, nasa lehzuala hma sawn turin theihtawp an chhuah mek zel Minister chuan a ti.

Serchhip District Hospital hmunhma hi chipchiar takin Health Minister chuan a fang a. Hospital building hlui thenkhat thiatin khum 100 awm theihna tur Hospital Building thar sak a nih dawn avangin Dr R Lalthangliana hian a sak dan tur inbuatsaihna kal mek a enpui a. Building thar sakna tur lungphum hi phum thuai tura ruahmanna siam a ni tawh bawk a ni. Minister hian Hopsital hmunhma hi tlawh kualin staff te dinhmun leh damlo enkawlna hmanrua an neih dan te, an mamawh hrang hrang te a enfiah a ni.

Health Minister hi Serchhip Chief Medical Officer Dr LP Malsawma, Serchhip District Hospital Medical Superintendent Dr. ZD Lalmuanawma leh thawktu dangte bakah press mi te, khawtlang hruaitute leh sawrkar official ten an lo dawng sawng a. Thawktute hian an dinhmun, an mamawh leh harsatna an neih te Minister hnenah hian an lo thlen a ni.

Health Minister Dr R Lalthangliana hi Aizawl atangin Dr.Hmingthanmawii, Addl.Director, DHS, H&FW Deptt; Dr.TC. Hmingthangi, SNO (RBSK/RKSKS), NHM leh mi pawimawh dang ten an tawiawm a ni.