K. V. Multipurpose School Durtlang in Krismas leh Kumthar lawmna atan an sikul compound eng mawi tak hmanga an chei ‘K. V. Christmas & New Year City’ tih chu nizan khan an hawng a, hawnna programme an sikul basketball ground-a an buatsaih chu Home Minister Pu R. Lalzirliana’n a hmanpui.

Home Minister chuan sikul neitu Pu K. Chhawnthuama te nupa in Krismas hunpui lawmna atan leh mipui in hun lawmawm leh hlimawm taka an hman theih nan eng mawi tak mi zawng zawng en theih leh tlawh theia an buatsaih chu ropui a tih thu a sawi a. He hmun hi thalai leh mipui ten rilru thawl, ngaihtuahna fim leh rilru thianghlim taka an tlawh a beisei leh a duh thu a sawi bawk a. Kum thum kalta atanga Sawrkarin Kumthar leh Krismas vuak vetah mipui te halpuah hallo tura a ngenna a hlawhtlin chhan chu mipui in an zawm that avang leh mipui lamin an khap pui vang a nih thu a sawi a ni.

K. V. Christmas & New Year City eng chhit nan hian a buatsaihtu ten cheng nuai 3 vel an seng a. Mipuite tan chhunah leh zanah tlawh theih tura ruahman niin kumthar January ni 5 thleng a tlawh thei dawn a ni.