Mizoram State Rural Livelihoods Mission (MzSRLM) Governing Body chu nimin khan Rural Development Minister Pu R. Lalzirliana hovin Secretariat Conference-ah an thukhawm a,Missionhnuaia hmalak tawhna te thlir hoin kalpui zel dan tur te an sawiho a ni.

MzSRLM Annual Plan 2012 -2014, thla 18 atana duan leh Sawrkar Laipuia Empowered Committee of National Rural Livelihoods Mission (NRLM) in an lo pawmpui tawh chu Governing Board in uluk leh zau taka an sawiho hnu in an pawmpui a. January thla ah NRLM hawnna leh State Level Workshop neih te an rel bawk a. Block Mission Management Unit hnuaia hnathawk tur lakte pawh chipchiar takin an sawi ho a ni.

National Rural Livelihoods Mission (NRLM) hi Sorkar Laipui-a Ministry of Rural Development in thingtlang mipui ten eizawnna ngelnghet an neih theih nan leh thingtlang-a mirethei te chawikan nan programme a kalpui mek Swarnjayanti Gram Swarozgar Yojana (SGSY) tun aia changtlung leh huap zau zawka kalpui a nih theih nana duan thar a ni a. Hemi zulzui hian state sawrkar zawng zawngte chu Mission dina bultan tura tih an ni a, Mizoram hi Hmarchhak biala a bultan hmasa ber a ni.

MzSRLM thawhkhatna (Intensive Phase) kaltlang hian Kolasib District-a Thingdawl leh Bilkhawthlir RD Block leh Serchhip District-a leh Serchhip leh East Lungdar RD Block ah te bultan tum a ni a. Phase I (Non Intensive) chu District  dang pali – Mamit, Champhai, Saiha leh Lawngtlai a Block 13 ah te kalpui tum a ni bawk.

National Rural Livelihood Mission peng khat North East Rural Livelihood Project (NERLP) chu World Bank tanpuina in Hmarchhak bial bik ah Ministry of Development of North Eastern Region kaihruianna hnuaiah state pali – Mizoram, Nagaland, Sikkim leh Tripura-a District pahnih theuh ah te kalpui tum a ni bawk. Mizoram ah chuan North East Rural Livelihoods Project hi Aizawl leh Lunglei District ah te kalpui tum a ni.