Vawiin khan Home Minister Pu R.Lalzirliana chuan Synod Conference Centre-ah C.Lalruata Biahzai tih Pi C.Lalthangpuii lakkhawm chu a tlangzarh. Minister chuan Pu C.Lalruata hi MLA te lo ni tawhin, mi dik leh ram leh hnam tana ngaihtuahna zawng zawng hmang mi niin mize tlang tak nei leh ram chanchin thui tak leh diktaka thangtharte hrilh thei ram rohlu zing a mi a ni, a ti a. A sulhnute ziaka dah a ni hi mi tamtak thinlungah Pu C.Lalruata hi a nung tan dawn chauh a ni, a ti.

C.Lalruata Biahzai hi phek 544-a chhah a ni a, a chhuahtu thuhma leh a thianten ama chanchin an ziahna telh niin, phek 429 chu ama ziah leh a thusawi hrang hrang lakkhawm a ni. Thuziak sei leh tawi 47 a awm a, chung zingah chuan rambuai chungchangte, zirna leh a siamthat dan chungchangte, politics chungchangte, ram leh khawtlang siamthatna lam hawi te, mimal leh pawl chanchin ziahna te, sermon, lemchan leh thildangte a tel a ni.