Vawiin khan Sports Minister Pu Zodintluanga hovin National Service Scheme (NSS) State Level Advisory Committee chu a vawi 14-na atan a pisa-ah an thukhawm.

Meeting-ah hian kum 2017-2018 chhunga NSS hnathawhna thlirletna hun neih a ni a. Kum 2018-2019 chhunga NSS Mizoram ten hma an lakna tur hrang hrang sawiho a ni a. Khawbung South HSS, Kawlkulh HSS, Lal Thanhawla HSS, Serchhip leh Institute of Chartered Financial Analysts of India (ICFAI), Aizawl ten NSS unit thar awm tura dilna an thehluh sawiho a ni a. NSS Programme officer leh volunteer tha ber thlan chhuah tur chungchang rel a ni bawk.

Kum 2017-2018 chhunga NSS hnathawh thenkhat chu: A thlawnin thisen unit 4390 Mizoram chhunga damdawi in hrang hrangah hman turin an pe a; thing 1009 phun thar a ni a, kum hmasa lama thingphun 3500 vel kumtluanin enkawl a ni bawk; faina lama inzirtirna hmun hrang hrang 231-ah kalpui a ni a; Save Chite Coordination nen tangkawpin tum thum lai Chite lui tihfai hnatlang neih a ni a; Mizoram hmun hrang hrangah zunin-12, chawlhbuk-7, tuikhur-4, Public bathroom-2 siam a ni a; NSS Volunteer mi 100 aia tam integration camp, training leh republic parade nei turin ram pawnah tirh chhuah an ni a; HIV/AIDS, Disaster Management, Fire Prevention, Career guidance vawi tam tak NSS volunteer leh mipuite tan buatsaih a ni.

NSS hi kum 1969 a din niin Mizoramah chuan PUC-ah kum 1972 khan din a ni a. State NSS Cell hi kum 1988 khan din niin State NSS Officer leh a hnuaia hnathawk ten an enkawl mek a. Kum 2017-2018 chhung khan NSS volunteer 30,100 awmin college 26 (104 unit) leh school/technical institution 54 (197 unit) an awm a ni.

Meeting-ah hian Sports & Youth Services, DM&R, Higher & Technical Education aiawhte, MZU NSS Cell Programme Coordinator leh State NSS Cell hotute an tel a ni.