Vawiin khan Lal Thanhawla Auditorium, Treasury ah MZP buatsaihin High School Leaving Certificate examination result 2018 a top ten a mizo tlingte chawimawina hun hman a ni a, School Education Minister Pu H.Rohluna chu Khuallian niin he hun hi a hmanpui.

Minister Pu. H.Rohluna chuan HSLC exam pass percentage a sang chho zel ni a lang chu lawmawm a tih thusawiin, Subject hrang hranga ti tha berte Mark hmuh zat en hian kan zirlaite hian thiamna tak tak an nei ngei tawh niin a lang, a ti a, HSLC 2018 result atang hian sawrkar enkawl school te leh Private school te dinhmun a in rual chho tan ni a a hriat thu a sawi bawk. Zirtirtute tan training hrang hrang buatsaih thin a ni a, zirtirtuten an school thawhna theuhah an training dawn ang ngei hian zirtirna kalpui turin ka chah duh a ni, a ti bawk. Pu H.Rohluna chuan zirlai kal khawmte hnenah zirlai tibuai thei Social media hrang hrangte hman tawk hre turin a chah a, Zirlaibu piah lama lehkhabu tha chhiar tam turin a fuih bawk. Vawiina zirlai hlawhtling chawimawite chu an tumah chiang turin a chah a, ram leh hnam ti hmingthatu leh mi tangkai ni chho zel turin duhsakna a hlan nghal bawk.

MZP President Tv.L.Ramdinliana Renthlei pawhin thusawiin MZP tobul leh hmalakna hrang hrangte bakah ramri humhalh leh zohnahthlak inpumkhatna kawnga an hma chhawpte a tarlang a, Top Ten a mizo tlingte a lawmpui rualin HSLC 2018 result a Pass awm miah lohna school la awm chu pawi a tih thu a sawi bawk. MZP President chuan kumin Mizoram quota a Technical course zir tumte tan seat inpekna kawngah a changtur diktak ten an chan ngei a duh thu sawiin, boruak muanawm tak hnuaia kalpui a nih ngei a beisei thu a sawi bawk.

MZP buatsaiha HSLC Top Ten a mizo tlingte chawimawina hunah hian zirlai 14 te hnenah citation leh lawmman hlan a ni a, Revd. Chuauthuama hnen atangin fuihna thu ngaihthlak niin MZP Cultural club ten Mizo lam entirna hunte hmangin, zaithiam zai te ngaihthlak a ni bawk.