Vawiin chawhma khan Sport & Youth Services  Department buatsaihin Convention Centre Lunglei ah  Distribution of Sports Incentive Cash Award 2016-2018 For Outstanding Sports Person Of Lunglei Disttrict chu neih niin Pu Chalrosanga MLA Lunglei West Bialtu chu khuallian a ni a, Dr.Ankita Chakravarty IAS Deputy Comissioner Lunglei chu khual zahawm a ni.

 Incentive Cash Award semna inkhawm hi Pu C.Lalremsanga, District Sports & Youths Services Officer Lunglei in  kaihruaiin khuallian Pu Chalrosanga chuan Sorkarin Sport tui mi  te tan sum tam tak a seng thin hi a vanneih thlak a, Sport Association te tan a phur awmin tan nasa takin an la a ni, a ti. Zofa ten National mai bakah International thlengin hnuhma kan nei hi a ropui a, Mizo tlangval leh nula ten Mizoram ah ngei  infiamna ruhrel tha sorkarin infiammite cho nan a siamsak a, a tih hlawhtlin erawh chu infiammi te kut ah a innghat a ni, a ti. Lunglei District pawh Sport ah a thang chak a, Association hrang hrang ten thalai te tan thahnem an ngaihna avangin Incentive Cash Award pawh an dawn phah a ni a ti. Infiammi ni tur chuan insum theihna, tumruhna bak ah teirei peihna te hi a pawimawh em em a ni tiin infiamna piah lamah an zirna ngai pawimawh bawk turin a chah. Incentive Cash Award hi infiam mi te thawh rah leh an chanvo dik tak a ni tiin he hun hi Infiammite tan tawpna ni lo in  a bul  tan na chauh a ni a ti bawk.

 Khualzahawm Dr.Ankita Chakravarty IAS,DC Lunglei pawh in thusawiin Sports hi mihring tan a pawimawh a taksa hrisel na atan a tangkai hle bawk a ni, a ti. Zuk leh hmuam ruihtheih thil laka fihlim theuh turin infiammite a chah a, infiamna hi kawng tinreng ah hmasawnna tha tak a ni a, sorkarin thalaiten Sports lama hma an sawn theih nan Infiamna hmanrua tam tak a ngaihtuah sak a heng hmanruate hmang hian khawtlang leh Mizoram ti hming tha turin a chah a ni. 

 Pu Lalawmpuia, Chairman, Lunglei District Sports Commitee pawhin thu sawiin Lunglei thailai tan Sport lama hmalatu leh Lunglei District mai nilo Mizoram ti hmingtha tu infiam mite a lawmpuia infiamna mai bakah lehkha thiamna hi thlah thlam loh tur in a duh a. Sport hi eizawnnan mi tam tak in an hmang a hemi a nih avang hian kan talent hi kan hriat chian a nu leh pa te pawn kan fate an tuina zawng hriat thiam sak a pawimawh hle a ni a ti.

 Vawiina Incentive Cash Award hi Sports Displine hrang hrang Foot ball, Hockey Judo, Karate, Power Lifting, Shooting, Sport Climbing, leh Table tennis a infiammi mi 45 te hnenah Rs 8,19,500 (Cheng Nuai riat singkhat sangkua leh zanga) khuallian, khualzahawm leh Sport Association hotu hrang hrang ten an sem a ni.