Sports Discipline chi hrang hranga inelnaa ti tha zualte hnena Sports & Youth Services Department-in a hlan thin Sports Incentive Cash Award hlanna hun vawiin hian Serchhip DC Office ah neih a ni a, Pi Sangchhin Chinzah, District Bawrhsap chuan Serchhip District atanga he Award dawngtu mi 7 te hnenah Rs. 42,000 a hlan.

 Bawrhsap chuan thusawiin, Mizote kan harhchhuak ve tan ta hi a lawmawm a, kan pumruate a lian lova, kan ei leh inte thleng pawhin India ram hnam dangte nena khaikhin chuan kan hniam zawk hle laiin ram pum huap inelnaa lawmman dawng thei kan awm thin hi a lawmawm tak zet ani a ti a. Pathianin theihna min pek te ti pung zel tura tan la tura chahin, tun aia sang zawk thleng tur chuan teirei peihna leh tih takzeta kan beih a tul a ni a ti. Incentive Cash Award hi lawmman a ni lova, tun aia sang zawk thleng tura infuihna a ni tih hriain theihtawp chhuah zel turin infiam mite a chah a, an hmalam hun atan duhsakna ahlan thu sawiin, Serchhipah Districtah Sports Office kan neih ve thuai theih nan chak taka hmalak mek zel anih thu a sawi bawk.

 Pu Lalremruata Ralte, Chairman, Serchhip District Sports Committee pawhin thu sawiin kan District atanga Sports Incentive Cash Award dawng thei te puala hun hman ani chu lawmawm a tih thu a sawi a. Kan District mai bakah Mizoram ti hmingthatu an ni chu chhuanawm a tih thu a sawi. Tuna an thlen chin hi a tawpna ni mai lovin a bul tanna ni zawk sela, tun aia sang zawka kal zel tura tan la turin a fuih nghal bawk a ni.

 He hun hi Pi Lalrampari, Chief Coach, Sports & Youth Services Deprtment chuan a kaihruai a, Mizoram sawrkarin Infiamna chi hrang hranga a ti thate tana hmathatna hmuh theih dan a ruahman thu sawiin, Sports Incentive Cash Award hi kum 2001 atanga sem tan a ni a, sum harsatna avangin kum tin erawh sem theih anih loh thu a sawi bawk. Tun tumah hian 2016-2018 chhung atan mi 890 hnenah Rs. 1,73,00,000 sem ral ani dawn ani a ti.

 Vawiina Serchhip District atanga Incentive Cash Award dawngtute chu:

1. Ramfangzauva S/o P. Lalthanmawia, Vanchengpui – National Football Championship for Santosh Trophy (Senior)
2. Lalramdinthara S/o Lalmuana, Thenzawl – 35^th National Senior Kyorugi Men & Women Championship (Senior)
3. Albert Lalrinfela S/o Thansiama, New Serchhip – J Starc’s Mirme Cup Demonstration Taekwondo Competition (Senior)
4. Lalruatpuia S/o Lalthantluanga, N. Vanlaiphai – Junior National Football Championship for BC Roy
5. Lalhriathlua S/o K. Lalbiakmawia, Chhiahtlang – 3^rd MBAI India National Muaythai & Muayboran Championship (Senior)
6. Robert Laltluangkima S/o Thansiama, New Serchhip – 1^st National Open Poomsae Taekwondo Championship (Senior)
7. Lalremruati D/o H. Lalramzauva, New Serchhip – 1^st National Open Poomsae Taekwondo Championship (Sub-Junior)