Vawiin khan PHE Minister Pu Zodintluanga hovin PHE Department chuan Aijal Club, Aizawl-ah ‘Review Meeting 2018’ an nei tan a, he ni 2 awh tur review meeting-ah hian district tin atangin SDO/AE chin chunglam PHE offcialaPHE Minister Pu Zodintluanga-te an tel kim hle.

PHE Review Meeting hawnna inkhawm PHED E-in-C Er.Lalmuanzova kaihhruaiah Khuallian Pu Zodintluanga chuan khawvel danglam zel milin Mizote pawh inher danglam a ngai a, tunlai tehnology changkang chho zelah Mizo mipuite tana thil lawmawm tak mobile apps thar ‘PHE Smart Water’ pawh nimin atangin hman tan a ni thei ta chu a lawmawm hle a ni, a ti a. PHE Department hnathawh dan leh mipuite tana an inpekzia hre lovin harsatna eng eng emawni avanga tui haw that loh changa mipuiten an dem ringawt thin hi a dik bik lova, a lehlamah chuan department pawhin mipuiten anmahni an fakselnate chu tanlak lehzual nan hmang se a duh thu a sawi a. Mizoram sorkar pawhin PHE Department tihchangtlun nan cheng vaibelchhe 20 ‘bonus’ a pek chu a lawmawm takzet a, heng sumte hi district tinah sem darh a nih tawh avangin hna pawh chak zawka an kalpui a beisei thu Minister chuan a sawi a. Sum sanction tawh chu chak zawka an hman thiam loh chuan sum dang sanction tur pawh a ti tlai thei a ni a, chuvangin sanction hmuh tawh a nih chuan department kuta sum lo luh ruala hnathawk tan nghal tura lo inbuatsaih lawk thin turin a hrilh. Review Meeting an neih chhungin estimate siam dan leh tender koh a nih dan chungchanga siamthat ngai laite an enhova tun aia kalpui dan tha zawk ruahman theih nise tiin PHE engineer-te chu a chah a, kum khatah vawi khat aia tam review meeting nei turin a fuih bawk. Tunlaiin AMRUT kaltlangin PHE pipe pawp (leak) engemawzat siamthat/thlak mek a ni a, chuvangin tuisem danah pawh harsatna tlem a awm thei avangin, mipuiten dawhtheih taka PHE Department hnathawh lai chu thlawp turin a sawm bawk a ni.

Khualzahawm Commissioner & Secretary, PHE etc Pu KT Beicho pawhin thusawiin tun dinhmunah Mizoramah chuan zokhua (rural) lamah drinking water supply chu 21% a ni a, khawpui (urban) lam chu 62% a huam tawh thung tih a tarlang a. India sorkarin kum 2022 ral hma ngeiin ramchhung pipe water supply chu zaa 90% hlawhtlinpui a tum a, Mizoramah pawh hei hi chak taka kalpui mek niin plan pawh mumal taka siam tawh a nih thu a sawi. Kum 4 chhung hnathawhna tur hun an neih chhungin theihtawpa tan la turin PHE engineer kalkhawmte chu a fuih a. Pu KT Beicho chuan mipuite tana service tha pe tur chuan department hotute ruahmanna leh thurel dan a pawimawh hle a, PHE dawrtu mipuite chu an darthlalang an ni tih hria a, mipuite fakselna te ngai pawimawh turin a chah bawk. 

PHE Department Review Meeting ni hnih chhung hian thupui hrang hrang hmangin Techical Session hman a ni dawn a. Vawiinah ‘Review of Water Supply Scheme’ chu Er. Anup Chhetry, SE(M) hovin neih a ni a; ‘Review of Sanitation’ hnuaiah Swacch Bharat Mission chungchang chu Mizzion Director SBM(G) Er C.Lallunghnema leh Septage Management & Drainage chu Er.C.Chawnghnuna , SE(S&S) ten an neihpui bawk a. Goods & Service Tax chungchang Taxation Department nen an zirho bakah Performance Audit chungchang Er.Anup Chhetry bawkin a zirtir a ni.