Home Minister Pu R. Lalzirliana’n vawiin khan Lengpui Airport-ah Police Training Centre-a training lai mi 350 zet ten Lengpui Airport chhunga hnim sam fai hnatlang an neih a hmanpui

 

 

Home Minister chuan thusawiin, India ram state a thlawhna  tum hmun mahni puala nei awmchhun kan ni a. Civil Aviation te chauh in a enkawl hi a hautak hle mai a. Chuvangin a hmun sam leh thlawhfai hna kan tih ve theih zawngah PTC atangin sipai 350 zet ten tha kan rawn thawh ve a ni, a ti a. Vawiina kan thawh bakah pawh hian Remna Ni ah zingkarah kan rawn thawk leh dawn a ni, a ti. Police Department te chauh nilovin Agriculture Department te pawhin Power Tiller te hmanga rawn thawk ve tur in rawn tirh kan tum ang a ti bawk.

Pu Zira chuan tunhma in hotu lian ten mahni huan bak insak hnaah te police-te an chhawr thin a, tunah dan dinglaite kengkawhin tih tawp a ni a. Hetiang zawng hian social work ah tangkai zawka hman zel kan tum a ni a ti.

Lengpui Airport huamchhung enkawlna hna hi Mizoram Florist Association ten kum hnih kalta atang khan an thawk a, pangpar leh thingkung mawi tak takte phunin awmze nei taka duangin an enkawl a. An hna a hautak em avangin harsatna pawh an tawk thin a, chutih laia PTC atanga a hmun sam leh thlawhfai hna tum thum zet an rawn pui thei chu lawmawm an ti tak zet a, chumai nilovin Home Minister meuhin a rawn ho thei chu an lawm takzet a ni tiin, an pawl President Pi Lalropari chuan a sawi a ni.

Vawiin hian Aviation Department-in thingpui tuihnai tak an buatsaih sak a. Parliamentary Secretary Pu Lalrinmawia Ralte; Police Hqrs. atangin DGP Pu Saizela; SP Security Pu F. Lalhuliana; PTC Principal Pu L.R. Dingliana leh IPRO Pu Lalsiama Fambawl ten Minister hi an tawiawm a ni.