Vawiin chawhnu dar 2:30PM khan 1st Batallion MAP chuan Independence Day 2010  Celebration Football Championship a an champion nomawi leh Parade intihsiak a pakhatna anih avangin lawmna hun Armed Veng 1st Battalion MAP te hmunah an buatsaih a. He lawmna inkhawmah ah hian Home Minister Pu R.Lalzirliana chu khuallian niin DGP Pu Lalrokhuma Pachuau, IAS leh Police Senior Officer ten an tel pui. 

Home Minister chuan Police infiam mi te'n Police hmel an tih mawi thin a vang in lawmthu a sawi a. Khawtlang  mi te tan thlamuan pui theih tur leh rin tlak a hna tha thawk zel tur in a chah bawk.  Police thenkhat chhung leh khat te'n transfer chungchang buaipui a  Office an dawr fo chu a fel lo a ni a ti. Transfer chungchangah hotute thutluk na chu zawm mai a that thu a sawi. Vantlang leh Police inkar a buaina awm zeuh thin te hi ti punlun tu ni lovin thelh dai zawng a hma lak  zel thin hi a finthlak a ni a ti. Police te thuam chak turin  dan leh hrai thiam bik(Legal Adviser) post pawh ruahman tawh a ni a ti. Sawrkar hna chu dan hnuaia chhechham a thawh a nih vangin dan anga kalpui a ni ang a, dan chunga leng  tumah an awm loh thu a sawi. Buaina awm hlek a Police awmna veng te'n Police insuan chhuak tur a an ti hluai zel  chu Sawrkarin  tha a tih loh thu a sawi a.Home Minister chuan IR Batallion te pawh Mizoram pawn ah tam zawk a duty tir an ni ang a ti bawk.

DGP Pu Lalrokhuma Pachuau, IPS pawh in Police hmalakna leh hmasawnna hrang hrang a hmuh te a sawi a. VVIP phur tu tur silai kahtlang theih loh Motor siam mek a nih thu a sawi.Vawiin inkhawm hi 1st Battalion MAP Commandant Pu V.Lalthakima, IPS in kaihruai in Police hotu te leh MFA hruaitu ten thusawina hun an hmang hlawm bawk. He lawmna inkhawm ah hian 1st Batallion MAP first division leh second division Football player te leh Parade Contingent member te chu  chawimawina  hlan an ni.