Vawiin khan Aijal Club-ah Mizoram Civil Service Association (MCSA) chuan an conference vawi 43-na an hmang a. Home Minister Pu R Lalzirliana chu Khuallian a ni. 

Khuallian Pu R Lalzirliana chuan MCS Officer te chu ram leh hnam tana a tak taka thawktute an ni a, ram hmasawnna an hnathawhah a innghat thuk hle a ni, a ti a. MCS Officer te chu midang tana entawn tlaka awm tur leh an hnathawhna kawnga hmasawnna nei zel turin a chah a. Hnathawhna kawng hrang hrangah rinawmna a pawimawh a ni tiin hnathawhnaa rinawmna chuan zahawmna a thlen a ni, a ti a. Service-a awm chhungin mi thatna hmuhsak a, anmahni tiphur tura awm a pawimawh thu sawiin, chu chuan hmasawnna leh hnathawhhonaah inlungrualna a thlen tur thu a sawi a. Pu Lalzirliana chuan MCS te chu Mizoram chhunga hnathawk nghet, awm reng an nih avangin sawrkar kut leh ke ber, mipuite hmasawnna tura thawktu an ni tiin theihtawp chhuah zel turin a fuih a. Sawrkar finchhuahna kawngah pawh an tan mar reng a ngaih thu a sawi a ni.

MCSA Conference hi chawhma lamah MCSA Vice President Pu K Laldingliana chuan a kaihruai a. MCS tharte lawmluhna neih a ni a, kum 2017-2018 chhunga MCS officer hlui boral ta te sunna leh hriatrengna hun hman a ni bawk. Chawhnu Session hi MCSA President Pu Lalzirmawia Chhangte  chuan kaihruaiin kum 2017-2018 chhunga MCSA activity hrang hrang General Secretary-in a tarlang a. MCSA Finance Secretary in Association sum leh pai dinhmun report pein, District Headquarters hrang hrang atangin report ngaihthlak a ni. MCSA Conference-ah hian Member ten agenda hrang hrang an sawi ho a, chungte chu:

1.         MCS Rules 2000 siam that,

2.         MCSA Welfare Fund Rules siam that,

3.         District Administration chak zawk leh awm ze nei zawka a kal theih nan tun hmaa DC Office-a Department hrang hrang awm thin te chu DC Office hnuaia rin luh leh tum ni se,

4.         Mizoram Sawrkarin NEDP hnuaia Sub Division hrang hranga hmasawnna ruhrel dinna kawnga hnathawh kalpui chu lawmawm an tih thu Resolution an pass bawk.