Mizoram State Legal Services Authority (SLSA) Member Secretary Pu Vanlalenmawia MJS chuan nimin khan Lawngtlai a tlawh a. Lawngtlai District Court building-ah District Legal Services Authority (DLSA) lam nen inkawm hona hun buatsaihin, District Jail Lawngtlai a tlawh bawk.

District Jail a tlawhnaah hian SLSA Member Secretary hi Lawngtlai DLSA Member Secretary, CJM Pu BT Lala Sakachep MJS, Legal Aid Counsel Pu ST Ramhmachhuanmawia, Advocate Pu MC Lalbiakliana leh DIPRO Pu C. Lalhruaitluanga MIS te'n an tawiawm a. Jailer Pu Lalbiakdika hovin thawktute'n an lo dawngsawng a ni.

Pu Vanlalenmawia chuan District Jail dinhmun a en fiah bakah, tangte nen inkawm hona hun a buatsaih a. Thubuai nei lai, mahnia ukil rawihna tur nei si lote chu DLSA-in a thlawna ukil a pek thin thu sawiin, sawrkarin a duhsakna chu simna nena chhang let turin a chah a. Tan in chu inhremna hmun ni lovin, nun siam thatna tur a ni tiin, thununna an tawh chu an dai pelh palh tawhte sim a, an chhuah hnua khua leh tui tha tak ni tura an nun thlak thlengtu ni se a duh thu a sawi.

District Jail Lawngtlaiah hian tun dinhmunah tang 23 an awm mek a, chu'ng zinga 16 chu an chungchang ngaihtuah lai (under trial prisoner) niin, 7 chu simple imprisonment-a convict tawh an ni.

 

Attachment

  • Loading attachment...