Vawiin khan Hausiampa Hall, Haulawngah Clean Lunglei leh Clean and Beautification Committee (C&BC), Haulawng tangkawp buatsaihin faina chungchang inzirtirna hun ‘Cleanliness Awareness Campaign’  hlawhtling taka neih a ni. Dr Ankita Chakravarty IAS, Deputy Commissioner Lunglei chuan khuallian niin a hmanpui. Lunglei Bawrhsap hi Haulawng VC-ten puanchei anlo hlan a ni.

Dr. Ankita Chakravarty IAS chuan faina leh thianghlimna chungchangah mitinten mawhphurhna lian tak kan nei a ni tiin Clean Lunglei chu NGO hming pakhat mai ni lovin thuchah ropui tak a ni, a ti a.  Faina chu chhungkaw tin leh mimal tin atanga intan tur a nih thu sawiin zirlaite, nakin lawka kan ram hruaitu ni mai tur ten faina pawimawhna an thinlunga an vawn reng a tul a ni a ti a. Ram leh hnam changkanna tehfung pawimawh tak chu faina kawnga an dinhmun a ni tiin Lunglei DC chuan kalkhawmte chu an chenna leh a chhehvel te tifai a, vawng fai tlat turin mahni theuh intiamna nei turin a chah a ni.

He hun hi Pu Vanlalruala Chairman Clean and Beautification Committee, Haulawng chuan kaihruaiin Clean Lunglei leh C&BC Secretary ten report an pe a. Pu Kh Tialthanga VCP Haulawng, Pu Kawlkunga Kawlni Chief Organiser Clean Lunglei ten thu sawiin UD&PA atangin Waste Management chungchang zirho a ni. 

He hun hmang tur hian mi thahnem tak kalkhawmin Haulawng mipuite hman turin Clean Lunglei chuan bawlhhlawh bawm lian an hlan a. Programme hman zawh hnu hian khawlai dung tifaiin hnatlang an thawk bawk a ni.